Сонуннар

Кыайыылаахтарга бириистэрэ туттарылынна

Көҥүл тустууга аан дойду чемпионатыгар анаан ыыппыт куонкуруспут кыайыылаахтарыгар бүгүн бириистэрэ туттарылынна. Куонкурус балаһыанньата, кимнээх хайдах кыайбыттара dzulurgan.ru сайтка эрдэ суруллан, сырдатыллан турар. Онон ону хатылаабаппыт.

Санатан эттэххэ, бу тэрээһиҥҥэ 33 киһи кытынна. Кинилэртэн спорт бэтэрээнэ Андрей Александров «Дьулурҕан» ыытар тустууга сыһыаннаах куонкурсугар үһүс төгүлүн бастаата. Кыайыылаахха «Покорившие Олимп» диэн, көҥүл тустууга олимпийскай чемпионнар тустарынан кинигэ туттарылынна.

Онтон Орто Халыма Хатыҥнааҕыттан төрүттээх Центр Безопасности ПТО үлэһитэ Герман Шкулев куонкуруска иккис көрдөрүүлэннэ. Кини «Первый борцовский» сурунаал редактора Иван Барашков, «Бриллианты борцовского ковра» диэн бэртээхэй кинигэтинэн наҕараадаланна. Биһиги куонкуруспутугар бэйэтин баҕа өттүнэн бириис туруорбут Иван Ивановичка улахан махтал! Дьон-сэргэ ортотугар чел олоҕу, спорду, тустууну сайыннарыыга хайҕаллаах дьыала.

Кыайыылаахтартан кылгастык чемпионат, куонкурус туһунан санааларын үллэстэллэригэр көрдөстүм.

Андрей Александров:

-Чемпионат – Олимпиада иннинээҕи сыл буолан, күүрээнэ улахан. Россияттан хаһааҥҥытааҕар да элбэх легионер кытынна. 97 киилэҕэ чемпионнаабыт Тажудинов – олох массыына курдук үлэлиир дии. Соһуччу түмүктэр элбэхтэр, онон көлүөнэлэр солбуһуулара бара турар диэххэ сөп. Таха, Гено, Тейлор – саастаах дьон, бүтэһик да чемпионаттара буолуо. Уопсайынан тустуу наһаа сайдыбыт. Угуевка эрэммитим… Ханныгын да иһин, политическай хааччахтааһынынан сибээстээн россияннарга – норуоттар икки ардыларынааҕы опыт тиийбэтэ таайда. Мин санаабар, Россия – АХШ хамаандаларын табаарыстыы көрсүһүүлэрин сөргүтүөххэ наада. Американецтар тустууга күүстээхтэр.

Чемпионнартан Исмаил Мусукаевы бэлиэтиэм этэ. Тэтимнээхтик, сөптөөх тактиканы тутуһан, өйдөөхтүк туһунна. Сэрэбиэйэ да кытаанах этэ. Заурбек Сидаков күүстээҕин өссө төгүл итэҕэтэн, ытыктабылы ылла. Уопсайынан, россиялар көрдөрүүлэрин ортонон сыаналыыбын. Кыахтарынан туһуннулар, сорох ыйааһыннарга – сиикэйдэр.

Куонкуруска олох бүтэһик күн, элбэхтик ырытан көрөн баран бэйэм билгэбин ыыппытым.

Бэйэбит бөҕөстөрбүт туһунан эттэххэ, дьоммут сааһырдылар. Эдэрдэр солбуйуллара буоллар.

Герман Шкулев:

-Чемпионат – элбэх саҥа ааттары арыйда. Соһуччу көрдөрүүлэр элбэхтэр. Уопсайынан, хамаандаларга барыларыгар кэриэтэ көлүөнэлэр солбуйсуулара бара турара көһүннэ. Уонна көҥүл тустуу географията кэҥээбитин бэлиэтиэм этэ. Россиялар санкцияҕа түбэһэн, аан дойду чемпионатыгар сөптөөх объема суох кытыннылар. Онон хаалыы баар. Ол да буоллар, Дагестан тустууга оскуолата бастыҥ буоларын өссө төгүл дакаастаата (3 кыһыл көмүс, 3 үрүҥ көмүс, 3 боруонса, ханнык да хамаандатааҕар ордук көрдөрүү – П.П.).

Бэйэбит уолаттарбытын туох диэхпиний?! Өссө да олимпийскай путевка ылар кыах баар.

Куонкурус үчүгэй бөҕө буоллаҕа дии. Урут эмиэ кыттар этим. Биирдэ «Спорт Якутии» футболга тэрийбит куонкурсугар ситиһиилэммитим. Спорт көрүҥүн барытын сэҥээрэбин. Биир дойдулаахтарбар, орто халымаларга ыалдьабын. Тустуу уонна хапсаҕай маастара Максим Шкулев тастыҥ убайым. Дьээдьэм Петр Егорович Шкулев Ойуһардаахха тренеринэн үлэлиир. Элбэх тустуугу иитэн таһаарда. Ол иһигэр, уолаттарга аан дойду чемпиона Иван Оконешниковы.

Куонкурус кыайыылаахтара Андрей Александрову уонна Герман Шкулеву өссө төгүл эҕэрдэлиибит! Маннык куонкурустар, атын да тэрээһиннэр өссө даҕаны ыытыллыахтара. Онно көхтөөхтүк кыттаргытыгар, “Дьулурҕаны” өйүүргүтүгэр баҕарабын.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *

176519
Бүгүн : 85