Кимиэхэ да маарыннаабаттык, аһаҕастык, уратытык…

Айар үлэнэн дьарыктанар киһиэхэ, кини уһун кэмнээх үлэтэ оҥоһуллан, силигин ситэн тахсыыта, күн сирин көрүүтэ – ураты үөрүүлээх түгэн. Аһара баран эттэххэ, холобур, кинигэ суруйан, бэлэмнээн таһаарбыт киһиэхэ, кини үлэтэ – син биир төрөппүт оҕотун кэриэтэ буолар. Тоҕо диэтэргин, ханнык баҕарар дьоһун үлэ чэпчэкитэ суохтук оҥоһулларын бары бэркэ билэҕит. Ол төһө эрэйдээҕин, ыараханын, төһө кэми ыларын – ааптар бэйэтэ эрэ билэр.

«Первый борцовский» сурунаал редактора Иван Барашков «Бриллианты борцовского ковра» диэн халыҥ тастаах, 224 страницалаах кинигэтэ таҕыста. Кинигэҕэ көҥүл тустуу аатырбыт бөҕөстөрүн, тренердэрин туһунан кэпсэнэр. Барыта 50-чэ киһи суруллубут. Ону бэйэҕит кинигэни ылан, ааҕан баран сыаналаарыҥ. Мин бу суруйууга ону барытын эридьиэстии барбаппын.

Иван – спорт куттаах киһи. Чулуу тустууктардааҕынан биллибит Чурапчыттан төрүттээх. Улуу тренер Д.П. Коркин аатынан республикатааҕы спортивнай интернат-оскуола выпускнига. Бэйэтэ хапсаҕайга Саха Республикатын спордун маастара. Спорт бары көрүҥнэрин кыраҕытык кэтээн көрөр, элбэҕи ааҕар-билэр. «Дьулурҕан» хаһыат көҥүл тустууга, футболга, хоккейга республикатааҕы конкурстарын кыайыылааҕа. Спорт, тустуу эйгэтигэр биллэр дьону кытта доҕордоһор. Аҕыйах сылтан бэттэх аан дойду аатырбыт тустууктарын туһунан нууччалыы бэрт хомоҕой тылынан очеркалары суруйан – спорду таптааччылары, тустууну сэҥээрээччилэри сүрдээҕин үөртэ. Тустууну билэринэн сөхтөрөр, ааҕааччыларга кэтэһиилээх ааптар буолла.

Холобур, сахалартан бастакынан ССРС-ка бастаабыт Алексей Ермолаев, Вячеслав Карпов, сахалартан аан дойду бастакы чемпиона Илларион Федосеев, номох буолбут тустуук Николай Захаров – Сахаачча, олимпиецтар Роман Дмитриев, Павел Пинигин, Александр Иванов, олимпийскай чемпион Александр Иваницкай, аан дойду чемпионнара Виктор Алексеев, Владимир Модосян, Салман Хасимиков, үтүөлээх тренердэр Дмитрий Коркин, Георгий Бураков уо.д.а. тустарынан кимиэхэ да маарыннаабаттык, аһаҕастык, уратытык, бэйэтин көрүүтүнэн, сыанабылынан ырытан суруйбута ааҕааччылар интэриэстэрин тардыаҕа дии саныыбын. Бастатан туран, бу кини – өссө оҕо эрдэҕиттэн сүгүрүйэр дьонун үтүө ааттарын үйэтиттэ, дьоҥҥо-сэргэҕэ тиэртэ диэххэ сөп. Билигин биһиги кэккэбитигэр суох, умнуллан эрэр аҕа көлүөнэ тустууктарын ааттарын өссө төгүл сөргүттэ.

Бу кинигэ тахсыыта, бэйэтэ улуу тренер аатынан кыһаны үөрэнэн бүтэрбит киһиэхэ – быйыл Дмитрий Петрович Коркин төрөөбүтэ 95 сылыгар дьүөрэлээн сөп түбэспитэ кэрэхсэбиллээх диэн сыаналыыбын.

Түмүккэ, ааптары – Иван Барашковы кинигэ таһаарбытынан эҕэрдэлиибит! Бу кинигэ этэргэ дылы, киниэхэ инники айар үлэтигэр үтүө үктэл буоллун. Иван санаата өссө уһуктан, аһыллан ааҕааччылары умсугутар саҥаттан саҥа суруйуулары, кинигэлэри бэлэмнээн таһаара турарыгар баҕарабыт. Итиэннэ бу саҥа кинигэ тахсыытыгар ааптарга күүс-көмө, өйөбүл буолбут дьоҥҥо барыларыгар барҕа махтал буолуохтун!

Петр ПАВЛОВ.

Ааптар хаартыскаҕа түһэриитэ.