Игорь Скрябин саҥа рекорду олохтоото

Ыам ыйын 26-27 күннэригэр – өрөспүүбүлүкэ бочуоттаах гражданина, СӨ норуотун артыыһа, Саха сирин 29 төгүллээх чемпиона Аркадий Михайлович Алексеев бирииһигэр чэпчэки атлетикаҕа Мэҥэ Хаҥалас улууһун нэһилиэктэрин икки ардыларыгар биирдиилээн уонна хамаанданан бастыыр иһин күрэхтэһии Майа стадионугар буолан ааста. Барыта 13 хамаандаттан 112 киһи кытынна.

Бү күрэхтэһиигэ Саха сирин стадионнарыгар ситиһиллэ илик ыраах ыстаныыны РФ спордун маастарыгар кандидат, өрөспүүбүлүкэ рекордсмена Игорь Скрябин көрдөрдө. Кини уһуну ыстаныыга 7 м 66 см түстэ. Онон былырыын Саха сирин норуоттарын оонньууларыгар Бороҕоҥҥо олохтообут рекордун 26 см куоһарда. Майа стадионугар олохтообут бэйэтин бастыҥ көрдөрүүтүн 15 cм тупсарда. Ити көрдөрүү Россия спордун маастарын нуорматыгар эппиэттиир.

Игорь Скрябин үстэ төхтүрүйэн ыстаныыга эмиэ ырааҕы барда – 15 м 50 см. Манна РФ спордун маастарыгар кандидат Георгий Шергин эмиэ кытынна, 14 м 83 cм ойдо. Өрөспүүбүлүкэ күүстээх ойооччута Анна Лыткина көрдөрүүлэрэ эмиэ куһаҕана суохтар. Мантан сайын өссө ырааҕы түһүтэлиэ диэн эрэнэбит. Кинилэр үһүөн – СӨ үтүөлээх тренерэ Б.Н. Ильин иитиллээччилэрэ буолаллар.

Күрэхтэһиигэ Мэҥэ Хаҥалас улууһун чиэһин көмүскүүр, 10000 м Саха сирин спортивнай оонньууларын чемпиона Константин Драгунов 1500 уонна 5000 м чемпионнаата. Константин Киргизияҕа, Кисловодскайга быйыл кыһын, саас сбордарга сылдьан кэллэ. Өрөспүүбүлүкэҕэ мантан сайын буолар күрэхтэҺиилэргэ кыттар былааннаах. Кини биллэрин курдук марафоҥҥа Киргизия государствотыттан кыттар, норуоттар икки ардыларынааҕы кылаастаах спорт маастара, Россия 5 төгүллээх чемпиона Сардаана Трофимоваҕа пейсмейкер буолар. Атыннык эттэххэ, дьарыгар бииргэ сүүрсэн көмөлөһөр. Костя соторутааҕыта Москваҕа полумарафоҥҥа иккис миэстэни ылбытын санатар тоҕоостоох.

Хамаанданан түмүккэ Майа сэлиэнньэтэ бастаата, Бүтэйдээх иккис, Харалар үһүс миэстэҕэ таҕыстылар.

Афанасий ИЛЛАРИОНОВ, күрэхтэһии сүрүн судьуйата.