Николай Тарскай төрөөбүт күнүгэр…

Дьокуускай. Бүгүн, ыам ыйын 8 күнүгэр, Саха спордун аҕатынан билиниллибит физическэй култуура уонна спорт төлөннөөх тэрийээччитэ Николай Николаевич Тарскай төрөөбүт күнүгэр, кини бюһун иннигэр Комсомольскай болуоссакка өйдөбүнньүк тэрээһин ыытылынна.

Бэлиэ күҥҥэ Саха Республикатын физическэй култуураҕа уонна спорка министрин бастакы солбуйааччы Александр Бугаев, Ил Түмэн депутата Геннадий Васильев, Уус Алдан улууһун баһылыгын солбуйааччы Михаил Борисов, Н.Н. Тарскай хос сиэнэ Людмила Кулагина, куоракка олорор Уус Алдан Баатаҕайын түмсүүтүн салайааччы Туйаара Готовцева кыттыыны ыллылар. Кинилэр, мустубут дьону эҕэрдэлээн туран, Н.Н. Тарскай олорон-үлэлээн ааспыт олоҕо үтүө холобур буоларын тоһоҕолоон бэлиэтээтилэр.

Эһиил, 2024 сылга Николай Николаевич Тарскай төрөөбүтэ 100 сылын республика киэҥник бэлиэтиэ. Маныаха анал хамыыһыйа састааба талыллан, үлэ былаана оҥоһулла сылдьар. Быйыл Бороҕоҥҥо Н.Н. Тарскай аатынан элбэх кыамталаах спортивнай комплекс үлэҕэ киллэриллээри турар. Ити курдук Дьокуускайга, Бороҕоҥҥо уонна төрөөбүт нэһилиэгэр Баатаҕайга – биллиилээх спорт деятелин үбүлүөйүгэр аналлаах тэрээһиннэр буолаллара, кини аатынан уулусса ааттанара, олоҕун уонна үлэтин киэҥник арыйан көрдөрөр кинигэ тахсара былааннанар.

Тэрээһиҥҥэ республика спорка общественноһа, Н.Н. Тарскай төрөөбүт Уус Алданыттан биир дойдулаахтара, спорт бэтэрээннэрэ, ыччаттар, куорат олохтоохторо муһуннулар. Николай Николаевич Тарскай сырдык аатын кэриэстээн, кини бюһугар сибэкки дьөрбөтүн ууруу сиэрэ-туома ыытылынна.

Тэрээһин, уопсай хаартыскаҕа түһүүнэн түмүктэннэ.

Петр ПАВЛОВ.

Ааптар хаартыскаҕа түһэриитэ.