Сонуннар

Ярыгин-2024: Тютрин уонна Потапов утарсааччылара билиннилэр

Красноярскай. Иван Ярыгин Кубогар спортивнай тустууга норуоттар икки ардыларынааҕы турнир иккис күнэ «санааны уоскутар» бөлөх тустуутунан саҕаланна.

Онуоха Яков Павлов уонна Федор Постников хотторон кэбистилэр. Кинилэр тустууларын Дьулурҕан ютуб каналыгар көрүөххүтүн сөп.

Дьахталлар тустууларыгар монголка Мунхбатка хотторбут биһиги кыргыттарбыт Карамзина уонна Копылова бэйэ-бэйэлэрин кытта тустууларыгар кыайыыны Карамзина ситистэ. Евгения Огородникова утарсааччыта тахсыбакка, быһа кыайыыны сурунна. Онтон Севиль Назарова көбүөр хаһаайката Новигы 5:5 ахсааҥҥа, очукуону бүтэһигинэн ылбытынан, кыайыылааҕынан ааҕылынна. Онон Карамзина, Назарова уонна Огородникова – турнир боруонса мэтээлин иһин тустууга кыттыахтара.

Эр дьоҥҥо 57 киилэҕэ олимпиец Гуламжон Абдуллаев (Узбекистан) – Д.Батомункуевы (Беларусь) очукуонан ыраастык хотон, киэһэ боруонса мэтээл иһин биһиги Арыйаан Тютриммытын кытта тустар буолла.

Онтон 70 киилэҕэ чечен Магомед-Эми Эльтимиров – Сайын Казырыгы 6:4 ахсаанынан хотто. Онон үһүс бириистээх миэстэ иһин Айсен Потаповтыын тустуоҕа.

Спортсменнарбыт тустуулара:

57 кг Яков Павлов – Д.Батомункуев (Беларусь) 3:4

57 кг Федор Постников – М.Садулаев (Чечня) 1:3

50 кг Александра Карамзина – А.Копылова 10:0

59 кг Евгения Огородникова – Нурдин Кызы (Кыргызстан) + –

55 кг Севиль Назарова – Т.Новик (Красноярскай) +5:5

79 кг Роман Николаев – А.Цоколаев (Хотугу Осетия) 0:10

65 кг Ньургун Скрябин – Д.Абдулкадыров (Дагестан) 2:4.

Күрэхтэһии салҕанар. Биһиги сайтпытын кэтээн көрө сылдьаргытыгар. Бэҕэһээҥҥиттэн саҕалаан спортсменнарбыт кимнээҕи кытта хайдах киирсибиттэрин барытын сырдатан иһэбит.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

137668
Бүгүн : 132