Сонуннар

Быйылгы «Аҕа күрэҕин» кыайыылаахтара билиннилэр

Таатта улууһун Дьүлэй нэһилиэгэр икки күннээх кытаанах киирсиилээх 23-с төгүлүн ыытыллыбыт “Аҕа күрэҕин» быйылгы чемпионнарынан Мэҥэ Хаҥаластан Окороковтар буолан, Ил Дархан А.С. Николаев туруорбут бирииһин – 300 000 уу харчыны туттулар.

Иккис миэстэҕэ, Амматтан Федоровтар тахсан, СР Үлэҕэ уонна социальнай сайдыыга министиэристибэтэ олохтообут 150 000 харчынан бирииһин туттулар. Үһүс бириистээх миэстэҕэ, Чурапчы улууһун ыала Кривошапкиннар тахсан, эмиэ бу министиэристибэ олохтообут 100000 уу харчытын тутта.

Бука бары кыттыбыт ыаллар анал бириистэринэн наҕараадаланнылар. Ил Түмэн Государственнай Мунньаҕын депутата, тустууга Аан дойду икки төгүллээх чемпиона, Россия 6 төгүллээх чемпиона Виктор Николаевич Лебедев үс ыалга анал бирииһин туттарда.

Икки күн устата Туора Күөлгэ 150-ча киһи мустан, бу дьону аһатан, хоннорон, остуол хотойорунан сахалыы мааны астаах сайдам остуолу тардан, ырыа-тойук бэлэхтээн, үрдүк таһымнаах тэрээһини ыыппыт баһылык О.Д. Осиповка, нэһилиэк бука бары олохтоохторугар, Таатта улууһун социальнай харалтаҕа, культураҕа управлениеларыгар, улуустааҕы реабилитационнай киин кэлэктиибигэр, тэрээһиҥҥэ сүүрбүт-көппүт дьоҥҥо кыттааччылар, ыалдьыттар барҕа махтал тылларын эттилэр.

Түмүккэ, олохтоох эбэлэр тикпит харысхал панноларын, ийэлэр тикпит олбохторун, аҕалар оҥорбут талах олоппосторун бука бары кыттыбыт 18 уоллаах аҕаҕа бэлэх быһыытынан алгыһы кытта туттардылар.

Ити курдук, өбүгэбититтэн кэлбит үтүө үгэстэри, үлэҕэ сатабыллары, дьоҕуру, талааны, кыаҕы, күүһү көрдөрөр «Аҕа күрэҕэ» Таатта сирин түмсүүлээх, ыалдьытымсах Дьүлэй нэһилиэгэр үрдүк таһымнаахтык буолан ааста.

Эһиилги күрэх Улуу Туймаада хочотугар ыытыллара былааннанна.

PS: “Аҕа күрэҕэ-2023” туһунан сиһилии суруйууну “Забота-Арчы” хаһыат муус устар 13 күнүнээҕи нүөмэригэр ааҕаарыҥ.

Екатерина Бястинова.

Добавить комментарий

Ваш адрес email не будет опубликован. Обязательные поля помечены *

161075
Бүгүн : 129