Ярыгин-2023: Тэрилтэм салалтатыгар барҕа махтал!

Красноярскайга, спортивнай тустууга «Иван Ярыгин Кубога» норуоттар икки ардыларынааҕы күрэхтэһии ыытыллан түмүктэннэ. Быйылгы түһүлгэҕэ эр дьон уонна дьахталлар тустууларыгар 12 дойдуттан барыта 400-чэкэ спортсмен кэлэн күөн көрүстэ.

Маннык улахан таһымнаах күрэхтэһиигэ Саха сирин хамаандата үс мэтээли ылары ситистэ. Ол курдук, Александра Карамзина 50 киилэҕэ, Севиль Назарова 55 киилэҕэ уонна Константин Капрынов 70 киилэҕэ пьедестал үһүс үктэлигэр тахсан, күрэхтэһии боруонса мэтээллэринэн наҕараадаланнылар.

Бу күрэхтэһии уонна уопсайынан тустуу – биһиги, сахалар киэҥ сэҥээриибитин ылаллар. Саха сиригэр элбэх киһи, спорду таптааччылар Красноярскай көбүөрүн сыныйан кэтээн көрбүт буолуохтаах дии саныыбын. Күрэхтэһиигэ республика суруналыыстара тиийэн сырдатыыга күүскэ үлэлээтилэр. Ол иһигэр «Сахапечать» тэрилтэ сайтыгар «Ярыгин-2023» диэн анал блок рубрика аһыллан, онно күрэхтэһии хаамыыта сиһилии сурулунна.

Маныаха бастатан туран, тэрилтэ генеральнай дириэктэрэ Ньургуйаана Михайловна Стручкова, кини бастакы солбуйааччыта Юлия Афанасьевна Бурнашева миигин итэҕэйэн командировка төлөбүрүн барытын хааччыйан ыыппыттарыгар улаханнык махтанабын!

Күрэхтэһии кэмигэр уонна ол да инниттэн https://ulus.media сайтка – турнир историятыттан, программатыттан, сахалар састааптарыттан саҕалаан, спортсменнарбыт хас биирдии тустуулара иһитиннэрии быһыытынан таһаарыллан истилэр. Итини тэҥэ хаартысканан репортажтар, экспресс-интервьюлар, видеолар тиһилиннилэр. Барыта 32 матырыйаал таһаарылынна. Маныаха сайт үлэһиттэрэ Туйаара Кокорева уонна Саргылаана Федорова – Красноярскайтан ыыппыт матырыйаалларбыт суһаллык уонна хаачыстыбалаахтык таһааран испиттэригэр эмиэ барҕа махталбын тиэрдэбин.

Ону таһынан https://dzulurgan.ru сайтка эмиэ турнирга сыһыаннаах атын суруйуулар таһаарылыннылар. «Дьулурҕан» хаһыат ютуб каналыгар https://www.youtube.com/channel/UCdQWiPUliiKpPOVV3JKNb5g биир дойдулаахтарбыт элбэх уонна биллэр бөҕөстөр тустууларын видеолара киллэрилиннилэр. Өссө “Дьулурҕан” хаһыакка тахсыаҕа.

Түмүккэ, «Сахапечать» тэрилтэ салалтатыгар, үлэһиттэригэр барыларыгар айымньылаах, ситиһиилээх үлэни баҕарабын. Тэрилтэбит аатын өрүү үрдүктүк тута сылдьыаҕыҥ!

Петр ПАВЛОВ, «Дьулурҕан» хаһыат редактора.