Дуобакка аан дойду чемпионата: Инники – Дарья Федорович (Беларусь)

Ю Чжан (Кытай)

Бэҕэһээ, бэс ыйын 13 күнэ – биһиги республикабыт киин куоратын “Триумф” Спорка бэлэмнэнии киинигэр буола турар 100 харахтаах дуобакка дьахталларга аан дойду чемпионата тыҥааһыннаах уонна хатыһыылаах буолла. Тоҕо диэтэххэ, бу күн дуобатчыттар икки тууру оонньоотулар: сарсыарда 10:00 чаастан уонна күнүс 16:00-тэн. Онон сылаалаах күн буолла диэххэ сөп. Оонньуу да түмүгэ онно дьүөрэлээх.

Бэйэбит кыргыттарбыт оонньууларын билиһиннэрдэххэ, үһүс-төрдүс туурдарга Ксения Нахова – Тансыккужинаны (Россия) уонна Петрусеваны (Беларусь) кытта тэҥнэстэ. Бу иннинэ иккитэ хотторон, чемпионаты мөлтөхтүк саҕалаабыт Наталья Шестакова үһүс туурга Идрисованы (Россия) кытта тэҥнэстэ, төрдүскэ Матрена Ноговицынаны хотон кэбистэ. Манна, Ноговицына бу иннинэ Верхуллуун (Нидерланды) тэҥнэспитин санатабын.

Наталья Садовска (Польша)

Дуобаты наһаа кэтээн көрбөппүн, билбэппин эрээри, үһүс туурга китаянка Ханьцин – Мотричкону (Украина) кыайыытын, соһуччу түмүгүнэн ааҕыам этэ. Оттон төрдүс туурга иккис китаянка – Ю Чжан аан дойду чемпиона Садовсканы (Польша) кытта тэҥнэһиитэ – үчүгэй көрдөрүү.

Бүгүн, бээтинсэҕэ сарсыарда 10:00 чаастан бэһис туур оонньоонно. Онуоха биһиги кыргыттарбыт наар тэҥнэһиини суруннулар: Ксения Нахова – Идрисованы (Россия), Матрена Ноговицына – Тансыккужинаны (Россия) уонна Наталья Шестакова – Ханьцины (Кытай) кытта. Ити үчүгэй дии саныыбын. Бу туурга Ю Чжан аны Ольга Федоровиһы (Беларусь) кыайыытын бэлиэтиэххэ сөп.

Виктория Мотричко (Украина)

Онон, бэһис туур түмүгүнэн балаһыанньа маннык: үс кыайыылаах, икки тэҥнэһиилээх Дарья Федорович (Беларусь) 8 очукуолаах инники таҕыста. Наталья Садовска (Польша), Ю Чжан, Чжао Ханьцин (иккиэн – Кытайдар), Тамара Тансыккужина (Россия) 7-лии очукуолаах тилэх баттаһан иһэллэр. Ксения Нахова (Россия) уонна Ольга Федорович (Беларусь) 6-лыы очукуолаахтар. Салгыы Полина Петрусева (Беларусь), Матрена Ноговицына (Россия), Хейке Верхул (Нидерланды), Айгуль Идрисова (Россия) 5-тии, Виктория Мотричко (Украина) уонна Наталья Шестакова (Россия) 4-түү очукуолаахтар. Эрса Негбре (Кот-д, Ивуар) уонна Хуслен Энхболд (Монголия) 2-лии очукуолаахтар. Оттон Аннелайн Якобс (Аруба) билиҥҥитэ очукуота суох.

Аны сарсын чаастан алтыс туур буолуоҕа. Онно көрсүөхтэрэ:

Ксения Нахова (Россия) – Эрса Негбре (Кот-д, Ивуар)

Хуслен Энхболд (Монголия) – Полина Петрусева (Беларусь)

Ю Чжан (Кытай) – Дарья Федорович (Беларусь)

Виктория Мотричко (Украина) – Ольга Федорович (Беларусь)

Хейке Верхул (Нидерланды) – Наталья Садовска (Польша)

Наталья Шестакова (Россия) – Аннелайн Якобс (Аруба)

Тамара Тансыккужина (Россия) – Ханьцин Чжао (Кытай)

Айгуль Идрисова (Россия) – Матрена Ноговицына (Россия).

Наталья Шестакова (Россия)

Дуобаты таптааччылар чемпионат хаамыытын http://fmjd.org уонна http://wcw2019duobat.ru сайтарга быһа, эбэтэр, “Триумфка” бэйэтигэр кэлэн, күрэхтэһиини илэ көрөргүтүгэр, гроссмейстердар ырытыыларын истэргитигэр ыҥырабыт. Сарсын бырагыраама быһыытынан, алтыс туур 14:00 чаастан саҕаланар.

Петр ПАВЛОВ.  

Эрэл ОХЛОПКОВ хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *