Василий Егоров – Россия 5 төгүллээх чемпиона!

Балаҕан ыйын 29 – алтынньы 9 күннэригэр Чита куоракка эр дьоҥҥо Россия боксаҕа чемпионата ыытыллан түмүктэннэ. Чемпионакка дойду 64 регионуттан барыта 337 боксёр, анал сүүмэрдээһини ааһан кытынна. Ол иһигэр, Саха сирин боксаҕа оскуолатын 14 иитиллээччитэ күөн көрүстэ. Быйылгы чемпионат Саха сирин хамаандатыгар ситиһиилээх буолла.

Билиҥҥи кэмҥэ тумус туттар боксёрбут – Европа икки төгүллээх чемпиона, аан дойду чемпионатын үрүҥ көмүс призера, Риотааҕы-96 Олимпиада кыттыылааҕа, спорт үтүөлээх маастара Василий Егоров (тренерэ – Николай Егоров) бу да сырыыга бэйэтин төрөөбүт республикатын, ыалдьааччыларын сүрдээҕин үөртэ, астыннарда.

Василий Егоров кыттар 51 кг ыйааһыныгар барыта 22 боксёр күөн көрсүбүтэ. Чита рингэтигэр кини барыта түөртэ таҕыста. Бастаан Александр Быкасовы (Ставрополь) баһыйа туппута. Иккис киирсиитигэр Василийы утары Сардорбек Таджибаев (Белгород) эчэйиилээх буолан тахсыбакка, биһиги уолбутугар кыайыы быһа бэриллибитэ.

Үһүскэ, уруккуттан эриһэр киһитэ, Россия чемпиона, аан дойду чемпионатын призера Ахтем Закировы (Крым) кытта көрсүбүтэ. Бу киирсии тыҥааһыннаах, сытыы буолара эрдэттэн сэрэйиллэр этэ. Этэргэ дылы, билиҥҥи кэмҥэ бу ыйааһыҥҥа икки күүстээхтэр утарыта таҕыстылар. Финал иннинэ – финал диэххэ сөп. Бу иннинэ бу боксёрдар 4-тэ сирэй көрсөн тураллар, ахсааннара 2:2.

Василий бэйэтэ уонна кини хамаандата Закировы кытта киирсиини хайдах ыытары эрдэттэн былааннаан, тактика өртүнэн сөптөөх суолу тутуһан, атаҕынан үчүгэйдик үлэлээн, тэйэ сылдьан таба охсуулары оҥортоон, түмүккэ сүрдээх наадалаах кыайыыны ситистэ.

Оттон чемпион аатын ким ыларын быһаарар бүтэһик түһүмэх: Василий Егоров – Расул Салиев (Дагестан). Кинилэр бу үһүс көрсүһүүлэрэ. Бу иннинэ 2019 с. Самараҕа буолбут Россия чемпионатын финалыгар тэҥ киирсиигэ кыайыылааҕынан Салиевы ааттаабыттара. Оттон былырыын Кемеровоҕа ыытыллыбыт чемпионакка, финал чиэппэригэр биһиги уолбут баһыйа туппута. Бу да сырыыга Василий Егоров үс раунд былаһын тухары эрдээхтик, кимиилээхтик киирсэн, эрэллээхтик кыайда. Итиэннэ Россия биэс төгүллээх чемпионунан буолла. Киниэхэ кыһыл көмүс мэтээли, чемпион куруҥ уонна 1,5 мөлүйүөн солк. туоһу сурук туттарылынна. Манна даҕатан эттэххэ, Читаҕа ыытыллан түмүктэммит боксаҕа Россия чемпионатын бириискэ фондата 26 мөл. солк. тэҥнэспитэ. Ол курдук, хас ыйааһын ахсын чемпионнар 1,5-лыы мөл. солк, иккис миэстэлээхтэр 250-нии уонна үһүстээбиттэр 125-тии тыһ. солк. харчынан наҕараадаланнылар. Бу хаһан да буолбатах баһырхай бириистэр!

Бу чемпионакка Томпо ыччата, спорт маастара Михаил Прокопьев (48 кг) үчүгэй киирсиилэри көрдөрдө. Ол курдук, кини Россия чемпионатын уонна спартакиадатын призера Игорь Царегородцевы кыайыыта улаханнык сыаналаныан сөп. Финалга тахсар иһин опыттаах Эдмонд Худояны да кытта тэҥҥэ кииристэ. Онон Михаил Прокопьев үһүс бириистээх миэстэҕэ тахсан, Саха сирин хамаандатыгар иккис мэтээли аҕалла.

Санатан эттэххэ, боксаҕа Россия чемпионатыгар мэтээлгэ тиксибит уолаттарбыт хайдах киирсибиттэрин Дьулурҕан хаһыат ютуб каналыгар көрүөххүтүн сөп.

Чемпионат түмүгүнэн, Саха сирин хамаандата үчүгэйдик кытынна диэххэ сөп. Өссө Михаил Варламов, Николай Григорьев куһаҕана суохтук кыттыбыттарын бэлиэтиир оруннаах.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *