Пионердар күннэригэр…

Бүгүн, ыам ыйын 19 – Пионерия күнүгэр, Саха Өрөспүүбүлүкэтин ВФСК ГТО регионнааҕы киинэ Адаптивнай физическай култуураҕа уонна спорка өрөспүүбүлүкэтээҕи киинин (РЦАФКИС) үлэһиттэрин кытта кыттыһан, В.П. Решетников аатынан Кырдьаҕастар уонна инбэлииттэр өрөспүүбүлүкэтээҕи интэрнээт-дьиэлэрин олохтоохторугар истиҥ, доҕордуу көрсүһүүнү тэрийэн ыыттылар.

Көрсүһүү сырдатар лекциянан саҕаланна. Кырдьаҕастар уонна доруобуйаларынан хааччахтаах дьон «Үлэҕэ уонна көмүскэлгэ бэлэм буол» (ГТО) Бүтүн Россиятааҕы комплекс остуоруйатын ахтыстылар, билиҥҥитин уонна инники сайдыытын туһунан ирэ-хоро иһиттилэр.

Программа саамай чаҕылхай чааһынан, анал усулуобуйаҕа сөп түбэһиннэриллибит спорт көрүҥнэрэ буоллулар. Кыттааччылар лазернай саанан бэргэнник ытыыга куоталастылар уонна «корнхол» диэн азартнай оонньууну боруобалаатылар. Саалаҕа күрэхтэһии тыыннаах, үөрүү-көтүү уонна күлүү-салыы түгэнэ аргыстанна!

Тэрээһин туһунан бэйэлэрин санааларын үөрүүлээх түгэн кыттыылаахтара үллэһиннилэр:

«ГТО комплекса олус суолталаах, ордук биһиги эдэр көлүөнэбитигэр. Бу — нация доруобуйатын төрдө», — диэн санаатын үллэһиннэ 72 саастаах Мария Семеновна Григорьева.

Оттон 79 саастаах Татьяна Константиновна Капустина: «Итинник бырайыактар үүнэр көлүөнэҕэ олус наадалар, уонна спорт туһунан бары саастаах дьоҥҥо агитациялыыр улахан суолталаах. Киин үлэһиттэрэ биһиэхэ кэлэн, маннык бырааһынньык тэрийэн, санаабытын көтөхпүттэригэр ис сүрэхпититтэн махтанабыт!», — диэтэ.

«Биһиги кэммитигэр бу комплекс «Үлэҕэ уонна көмүскэлгэ бэлэм буол» диэн ааттанара, мин ол саҕана нормативтары барытын кыһыл көмүс бэлиэҕэ туттарбытым!», — диэн киэн тутта ахтан ааста, 86 саастаах Егор Федорович Лаптев.

«ГТО барытыгар!» диэн девиз аннынан ааспыт көрсүһүү бары кыттыылаахтарга күүс-уох, истиҥ сыһыан уонна үтүө санаа бэлэхтээтэ. Маннык акциялар спорка уонна чөл олоххо саас хааччаҕа суоҕун өссө төгүл чаҕылхайдык дакаастыыллар.

Варвара ГАВРИЛЬЕВА.