Студеннар бастыҥнары быһаарыстылар

М.К. Аммосов аатынан университет Тустууга саалатыгар, Саха государственнай университетын (Хотугулуу-Илиҥҥи федеральнай университетын) маастар-профессордарын бириистэригэр студеннарга көҥүл тустууга республикатааҕы күрэхтэһии ыытылынна.

Күрэхтэһиигэ алта хамаандаттан (М.К. Аммосов аатынан ХИФУ, Р.М. Дмитриев аатынан Олимпискай эрэл училищета, АГАТУ, Чурапчытааҕы физическэй култуура уонна спорт института, А.И. Иванов аатынан Сунтаардааҕы спортивнай оскуола, И.Е. Винокуров аатынан Намнааҕы педагогическай колледж) барыта 66 бөҕөс күөн көрүстэ.

Сүрүн судьуйанан Виктория Семеновна Алексеева, сүрүн суруксутунан Владимир Гаврильевич Торговкин үлэлээтилэр.

Бастакы ыйааһыҥҥа быһаарыылаах хапсыһыыга Любомир Ашеин – Айаал Белолюбскайы 9:8 ахсаанынан кыл мүччү кыайан бастаата. Иккис ыйааһыҥҥа Артём Слепцов үстэ тустан, утарсааччыларын киһилээбэтэ. Бүтэһиккэ Күндүл Местниковы очконан ыраастык хотто. Коркин турнирыгар бэһис, Крылов тустуутугар иккис миэстэлэммит Василий Григорьев 65 киилэҕэ быһаарыылаах киирсиигэ Россия чемпионатын призера Виктор Яковлевы 17:6 ахсаанынан баһыйа тутта. Эдэр талааннаах тустуук Анатолий Иванов (70 кг) үһүс күүрээннээх күрэхтэһиитигэр кыттан, бастакы миэстэни былдьаһыыга биир дойдулааҕар, Саха сирин чемпиона Юлиан Григорьевка хотторон иккис миэстэлэннэ.

Ити курдук, бэрт сытыы хапсыһыылардаах күрэхтэһии ыытыллан түмүктэннэ.

Күрэхтэһии түмүгүнэн бастыҥ бөҕөстөргө анал бириистэр туттарылыннылар. Ол курдук, Ил Түмэн депутата, спорт маастара Иван Иванович Данилов олохтообут бирииһэ — Игорь Матвеевка, математическай наука доктора Ньургун Петрович Лазарев бирииһэ — Любомир Ашеиҥҥа, педагогическай наука доктора Николай Петрович Олесов анал бирииһэ — Василий Григорьевка туттарылыннылар.

Күрэхтэһии түмүгэ:

57 кг (14 кыттааччы): 1. Любомир Ашеин (ЧГИФКиС), 2. Айаал Белолюбскай (ХИФУ), 3. Роман Кириллин, Михаил Осипов (иккиэн ОЭУ).

61 кг (10): 1. Артём Слепцов, 2. Кундул Местников, 3. Уйгун Степанов (иккиэн ЧГИФКиС), Дамир Явловскай (ХИФУ).

65 кг (13): 1. Василий Григорьев, 2. Виктор Яковлев, 3. Валентин Бурнашев (үһүөн ХИФУ), Артур Макаров (ОЭУ).

70 кг (10): 1. Юлиан Григорьев (ОЭУ), 2. Анатолий Иванов, 3. Юрий Винокуров (иккиэн ХИФУ), Арсен Кононов (ЧГИФКиС).

74 кг (6): 1. Игорь Матвеев, 2. Давид Чириков, 3. Иннокентий Бабаранов, Вячеслав Слепцов (бары ХИФУ).

79 кг (3): 1. Алексей Захаров, 2. Вадим Винокуров (иккиэн ОЭУ), 3. Богдан Чиряев (ХИФУ).

86 кг (4): 1. Былаас Сивцев, 2. Владислав Родионов (иккиэн ХИФУ), 3. Артём Афанасьев (ЯАТУГА), Андрей Охлопков (АГАТУ).

92 кг (2): 1. Степан Иванов (ОЭУ), 2. Тамдын Оол Баатыр (ХИФУ).

97 кг (2): 1. Адам Николаев (ОЭУ), 2. Владислав Романов (ХИФУ).

125 кг (2): 1. Ньургун Багынанов (ХИФУ), 2. Михаил Николаев (ОЭУ).

Петр ПАВЛОВ.