“Дьулурҕан” куонкурсугар ким инники таҕыста?

Дьэ, Европа көҥүл тустууга чемпионатыгар анаан ыыппыт куонкуруспутугар, син эмиэ Братиславаҕа буола турар түһүлгэҕэ курдук, тыҥааһын күүрэр. Бөөлүүн биэс ыйааһыҥҥа быһаарыылаах хапсыһыылар кэннилэриттэн кыайыылаахтара ааттара билиннэ.

Санатан эттэххэ, «Дьулурҕан» куонкурсугар сүүрбэ киһи, хаһыат саамай бэринилээх ааҕааччылара уонна тустууга ыалдьааччылара кыттыыны ыллылар.

Бастакы финалларга кимнээх тахсыбыттарын сылыктааһын (сөптөөх хоруй – 1 очукуо) түмүгэ оҥоһуллубута. Аны иккис финаллары (1), бастакы биэс ыйааһын чемпионнарын (2-лии очукуо) уонна Арыйаан Тютрин хаһыс миэстэни ыларын (3 очукуо) билгэлээһини ааҕыы-суоттааһын буолла. Онуоха барыллааьын ааҕыынан билиҥҥитэ Вадим Петров, Андрей Александров уонна Владислав (араспаанньатын суруйбатах) 26-лыы очкуону хомуйан инники таҕыстылар. Данил Данилов кинилэртэн биир эрэ очукуонан хаалан иһэр. Салгыы, 24-түү очукуолаах Мила, Валерий Ефремов уонна Николай Алексеев иһэллэр.

Аны, хаалбыт биэс ыйааһын чемпионнарын эрэ ааҕыы хаалла. Манна сыһыары тутан эттэххэ, dzulurgan.ru сайтка Куонкурус аннынан баар Комментарии суруллубут бары сылыктааһыннары хас биирдии киһи бэйэтэ ааҕа-суоттуу сылдьарыгар этэбин.

Сарсын таһаарар түмүгүм бастаан-утаа барыллааһын курдук буолуоҕа. Ыксалга сыыстарбат инниттэн. Оттон эһиги бигэргэтиигитинэн, ырытыыгытынан бүтэһиктээх түмүк таһаарыллыа. Ол аата, хас биирдии кыттааччы бэйэтэ куонкурус судьуйата буолар. Уопсай сүбэнэн, биир санаанан. Дьэ, ол эрэ кэнниттэн кыайыылаахха бирииһэ туттарыллыа.

Кыайыылаах киһи, Израил Тотоонти “100 лет вольной борьбы» диэн сэдэх ыйынньык-кинигэтин анал бириис быһыытынан туттуо.

«Дьулурҕан».