Күрэс тэтимин көрдөрөр бэртээхэй киинэ!

Дьиҥнээх олоххо олоҕурбут Саха сиригэр ат сүүрдүүтүн туһунан күрэскэ сыһыаннаах, хайдах курдук дьаныардаах үлэ түмүгэр кыайыы ситиһиллэрин көрдөрөр киинэ.

Спид Стар – Саха сирин Ил Дарханын сүүрдүүтүн үс төгүллээх кыайыылааҕа (2010, 2011, 2012). Кини бастыҥ көрдөрүүтэ билигин да куоһарылла илик. Баайааччы – Сергей Ядреев, сүүрдээччи – Егор Оконешников.

Киинэ режиссера уонна сценариһа Алексей Амбросьев, генеральнай продюсер Степан Порядин. Оруолларга: Павел Ченянов, Иннокентий Луковцев, Павел Колесов, Алексей Егоров-Өркөн, Степан Петров, Айталина Цыпандина-Винокурова.

Киинэ умсугутуулаах, күрэс туһунан буолан түргэн тэтимнээх. Артыыстар бары оруолларын ситиһиилээхтик аһан көрдөрдүлэр. Көстүү саҕаланыаҕыттан көрөөччү болҕомтотун тардаллар. Хайдах эрэ, көрө олорон үтүө санаа кыайыан, кырдьыктаах дьыала өрөгөйдүү туруон баҕараҕын. Спид Стар биэтэккэ бастакынан тахсыытын көстүүтэ киһи сүргэтин көтөҕөр. Этэргэ дылы, ойон туран хаһыытаабыккын, ытыс таһыммыккын бэйэҥ даҕаны билбэккэ хаалаҕын. Чэ, ону эһиги бэйэҕит илэ хараххытынан көрдөххүтүнэ сыаналыаххыт.

Киинэни көрөн баран, биллиилээх ат баайааччы, үтүөлээх тренер Сергей Ядреев уонна өрөгөйдөөх сүүрдээччи Егор Оконешников тустарынан аны сиһилии кинигэ тахсара эбитэ буоллар дии санаатым. Тоҕо диэтэххэ, ат күрэһэр бэриниилээх дьон олохторугар элбэҕи: кыайыы үөрүүтүн, хотторуу хомолтотун, араас моһоллору көрсүбүт буолуохтаахтар.

Биир тылынан, кэнники кэмҥэ саха киинэтэ сайдан, кэҥээн, биһирэбили ылар буолбута кэрэхсэбиллээх. Сайдыы тэтимин батыһан эдэр дьон ылсан, бииртэн биир үчүгэй киинэни оҥорон, көрөөччүлэр болҕомтолорун тардаллара хайҕаллаах диэххэ сөп.

“Спид Стар” киинэ кулун тутар 27 күнүттэн бүтүн Саха сирин үрдүнэн көрдөрүүтэ саҕаланыа. Барыгытын көрөргө ыҥырабыт. Бэртээхэй киинэ! “Лена” киинэ тыйаатырыгар тэриллибит бастакы, сабыылаах көрдөрүүгэ ыҥырыллыбыт дьон сөбүлээтилэр.

Петр ПАВЛОВ.

Ааптар хаартыскаҕа түһэриитэ.