Тимиринэн дьарыктаныы үтүө сабыдыала

Дьокуускай куорат төрүттэммит күнүн бэлиэтиир үтүө күнүгэр – балаҕан ыйын 7 күнүгэр Комсомольскай болуоссакка ыараханы көтөҕүү күрэхтэһиитин тула элбэх кыттааччы, көрөөччү тоҕуоруһан, үрдүк таһымнаах, дьону сөхтөрөр, абылыыр түгэннэрдээх тэрээһин ньиргиэрдээхтик буолан ааста.

Дьон-сэргэ санаатыгар сэргэх, сөҕүмэр үтүө түгэннэри хаалларда. Күрэхтэһии уратыта диэн, көҥүл быраабыланан, хайдах сатанарынан сахалыы-махалыы штанганы өрө тардар көҥүллэнэн, элбэх кыттааччы үөрэ-көтө кыттыбыта, дьону түмүү үтүө хардыытынан буолла.

Кыттааччылар кэккэлэрэ ньыгылын, Дыгын оонньууларын буруолуу сылдьар кыайыылааҕа, Россия мас тардыһыыга кылаабынай тренерэ, Россия пауэрлифтиҥҥэ үрүҥ көмүс призера, бэтэрээннэргэ пауэрлифтиҥҥэ бу сыл чемпионнара, рекордсменнара кыттан бигэргэттилэр.

Бу көрүҥҥэ урукку өттүгэр хаһан да оонньоммотох сыаналаах бириистэр элбэхтэрэ – кыттааччылар, көрөөччүлэр үөрүүлэригэр кубулуйан, тула киһи барыта үөрэ-көтө сылдьар эйгэтэ бэрт ыраас-кэрэ күрэҕи сабардаата.

Бу күрэхтэһии уратытынан, элбэх киһини сөхтөрөр түгэннэрдээҕэ буолла. Ол курдук, 72 саастаах Александр Скрыбыкин Хаандыга курдук ыраах сиртэн уруулу мускуйан айаннаан кэлээт, тутатына 240 киилэни өрө тардан дьону сөхтөрдө! Кини бу көрдөрүүтүнэн быйыл Екатеринбург куоракка бэйэлэрин саастыылаахтарыгар олохтообут Россия рекордун 24 киилэнэн тупсарда!

Тимиринэн дьарыктаныы киһи санаатын, доруобуйатын өрө көтөҕөр, толкуйдатар дьоҕурун туоһулаан, кэккэ сөҕүмэр түгэннэр салҕаннылар. Ол курдук, аҥар илиитэ суох инбэлиит кыттааччы протез көмөтүнэн 210 киилэни бэрт холкутук өрө тардан, көрөөччүлэри сөхтөрдө.

66 саастаах Россия рекордсмена Антон Адамов травматын эппирээсийэлэтэн балыыһаттан тахсаат кыттыыны ылан 210, 230 киилэлэри кыайа тутан, үсүһүгэр 260 киилэҕэ холонуохтааҕын судьуйалар, тренерэ тохтоттулар.

Дьэ, ити курдук араас дьикти, киһини сөхтөрөр үтүө сабыдыаллаах күрэхтэһии барахсан түмүктэнэн, тымныйыах-тыалырыах буолбут халлааны киэр кыйдаан, күннээх күһүҥҥү үтүө күннэри куду аста.

Кыайыылаахтар ботуччу харчынан бириис туттулар, элбэх кыттааччы анал бириискэ тиксэн, көрөөччүлэр үөрүү, тимиринэн дьарык үтүө сабыдыалын илэ көрөн сөҕөн-махтайан, дуоһуйан тарҕастылар.

Күрэхтэһиини “Сталь” фитнес кулууп салайааччыта, Россия пауэрлифтиҥҥэ чемпиона Быковников Вячеслав Сергеевич иилээн-саҕалаан тэрийэн ыытан, дьон-сэргэ махталын ылла.

Руслан Ефремов.