“Азия оҕолоро”. Саҕалааһын хайдах этэй?

Эдэр кэрэспэдьиэннэр “Хотугу Сулус” түмсүүлэрин салайааччыта, элбэх бырайыактар ааптардара, Саха Өрөспүүбүлүкэтин култууратын үтүөлээх үлэһитэ Татьяна Афанасьевна Гоголева уонна Өрөспүүбүлүкэ национальнай бибилэтиэкэтин көҕүлээһиннэринэн бэртээхэй тэрээһин ыытылынна.

Ол курдук, «Азия оҕолоро» норуоттар икки ардыларынааҕы спортивнай оонньуулары көрсө, Саха Өрөспүүбүлүкэтин бастакы бэрэсэдьиэнэ Михаил Ефимович Николаев биир санаалаахтара, оччотооҕу Ыччат, туризм уонна успуорт миниистирэ Виктор Петрович Ноговицыны, министиэристибэ эппиэттээх үлэһитэ Михаил Егорович Друзьяновы уонна үс аан дойду чөмпүйүөнүн иитэн-такайан таһаарбыт Варвара Иосифовна, Степан Степанович Контоевтары кытта истиҥ көрсүһүү тэрилиннэ.

Көрсүһүү СӨ национальнай бибилэтиэкэтин устуоруйаҕа аналлаах саалатыгар ыытылынна. Манна Виктор Петрович уонна Михаил Егорович бастатан туран, «Азия оҕолоро» оонньуу хайдах тэриллибитин, туох үлэ ыытыллыбытын, бастакы оонньуу хайдах ааспытын, Саха сирин сайыннарыыга М.Е. Николаев идиэйэтин толору кэпсээтилэр.

Кэпсэтии барыта видеоҕа уһуллан, бибилэтиэкэ архыыбыгар ууруллан, кэнэҕэһин дьоҥҥо-сэргэҕэ, ыччаттарга туһаналларыгар, көрөллөрүгэр көмөлөөх, үйэлээх буоларыгар туһуланна.

Онтон Контоевтар дьиэ кэргэн оҕону иитиигэ бэйэлэрин холобурдарын элбэх көрдөрөн кэпсиир матырыйаалларынан бигэргэтэн, сиһилии кэпсээтилэр, көрдөрдүлэр. Варвара Иосифовна уонна Степан Степанович оҕону дьиэ кэргэҥҥэ хайдах иитии туһунан бэйэлэрэ баай үөрүйэхтээхтэрин, балачча матырыйааллаахтарын көрөн-истэн баран, дьиэ кэргэн педагогикатыгар анаан кинигэ суруйан таһаарыахтарын сөп эбит диэн санааҕа кэлэҕин. Оннук да, былаанныы сылдьаллар быһыылаах…

Көрсүһүү хас да камераҕа уһулунна. Холобур, мин уһулууларбын “Дьулурҕан” хаһыат https://www.youtube.com/@Dzulurgan/videos ютуб каналыгар сыыйа-баайа көрүөххүтүн сөп.

Петр ПАВЛОВ.

Ааптар видеоҕа уонна хаартыскаҕа түһэриилэригэр, көрсүһүү түгэнэ.