Сонуннар

«Азия оҕолоро-2024»: Бастакы күн Саха сирэ икки мэтээллэннэ

Дьэ, күүтүүлээх оонньуубут саҕаланна. Бастакы күн спорт хас да көрүҥэр күрэхтэһиилэр саҕаланнылар. Олортон «Өрөгөй» Спорка бэлэмнэнии киинигэр үс көбүөрүнэн ыытыллыбыт самбо күрэхтэһиитэ маҥнайгы кыайыылаахтары быһаарда.

Бастакы күн уолаттар – 46, 53, 64 кг, кыргыттар – 41, 47, 59 кг ыйааһыннарга ким күүстээҕин быһаарыстылар. Спорт бу көрүҥэр Монголия, Таджикистан, Казахстан, Кыргызстан, Узбекистан хамаандаларын тэҥэ Сибиирдээҕи, Ураллааҕы, Дальнай Востоктааҕы федеральнай уокуруктар, Москва, Саха Республикатын эдэр спортсменнара күөн көрүстүлэр.

Барыллааһын хапсыһыылар түмүктэринэн финалга тахсыбыттар биллибиттэрин кэннэ, буоларын курдук, «санааны уоскутар» хапсыһыылар буоллулар.

Дьэ, ол кэнниттэн уолаттарга уонна кыргыттарга барыта алта ыйааһыҥҥа кыайыылаах аатын ким ыларын быһаарар киирсиилэр ыытылыннылар. Онуоха кыргыттарга Саха сирин хамаандатыттан 47 киилэҕэ Анастасия Шевченко үһүс бириистээх миэстэ иһин киирсиигэ кыайыыны ситиһэн, оонньууну тэрийэн ыытар республикаҕа маҥнайгы – боруонса мэтээли аҕалла.

Онтон уолаттарга 53 киилэҕэ Иван Лапушкин быһаарыылаах хапсыһыыга узбек Хайдарбек Урагбаевка сабырыттаран, иккис миэстэни хааччынна.

Онон, «Азия оҕолоро» норуоттар икки ардыларынааҕы VIII спортивнай оонньуу бастакы күнүгэр Саха сирин хамаандата икки мэтээллэннэ. Атын ыйааһыннарга кыайыылаахтарынан Узбекистан, Казахстан, Кыргызстан, Монголия, Дальнай Восток спортсменнара буоллулар.

Түөрт сылга биирдэ ыытыллар улахан таһымнаах күрэхтэһии, син эмиэ Олимпиада курдук тэриллэн ыытыллар. Ол сиэринэн, күрэхтэһии түмүктэммитин кэнниттэн тута, кыайыылаахтарга уонна бириистээх миэстэҕэ тиксибиттэргэ анаан, “сибэккинэн наҕараадалааһын” сиэрэ-туома буолла. Санатан эттэххэ, кинилэри мэтээлинэн наҕараадалааһын сарсын киэһэ Комсомоллар болуоссаттарыгар буолуоҕа.

Күрэхтэһиилэр салҕанан бараллар. Биһиги сайтпытын кэтээн көрө сылдьаргытыгар, «Азия оҕолоро» оонньуу хаамыытын билэ-көрө тураргытыгар баҕарабыт.

Петр ПАВЛОВ.    

     

Ааптар хаартыскаҕа түһэриитэ, видеоҕа уһулуута.

Добавить комментарий

Ваш адрес email не будет опубликован. Обязательные поля помечены *

196903
Бүгүн : 276