Николай Тарскай төрөөбүт күнүгэр…

Биллиилээх государственнай уонна общественнай деятель, Саха сиригэр физическэй култуура уонна спорт сайдыытын төрүттээбит Николай Николаевич Тарскай төрөөбүтэ 100 сыллаах үбүлүөйүн бэлиэтээһин, кини төрөөбүт күнүгэр өссө Кыайыы болуоссатыгар сарсыардааҥҥы эти-хааны эрчийиинэн саҕаламмыта.

Ону тэҥэ, ол кэмҥэ «Саха» национальнай көрдөрөр иһитиннэрэр хампаанньа «Саҥа күн» биэриитигэр Саха Республикатын физическэй култуураҕа уонна спорка министрин солбуйааччы Гаврил Мохначевскай, Дьокуускай олорор Уус Алдан улууһуттан төрүттээхтэр түмсүүлэрин салайааччы Егор Неустроев кыттан, Н.Н. Тарскай туһунан кэпсээтилэр уонна бу күн суолтатын, былаанын билиһиннэрдилэр.

Күнүс 12:00 чааска, Н.Н. Тарскай аатынан “Туймаада” стадион аттыгар, бюһун иннигэр үгэс быһыытынан үөрүүлээх кэрэ бэлиэ түгэни бэлиэтээн, миитин уонна сибэкки дьөрбөтүн ууруу буолла.

Кэрэ бэлиэ түгэҥҥэ Ил Түмэн бэрэссэдээтэлин бастакы солбуйааччы Александр Жирков, Саха Республикатын физическэй култуураҕа уонна спорка министрэ Леонид Спиридонов, Уус Алдан улууһун баһылыгын бастакы солбуйааччы Илья Артамонов, Саха Республикатын, Россия физическэй култууратын үтүөлээх үлэһитэ Афанасий Алексеев, Саха сирин үөрэхтээһиҥҥэ үтүөлээх үлэһитэ Егор Неустроев, Россия физическэй култуураҕа уонна спорка үтүөлээх үлэһитэ Прокопий Готовцев, Н.Н. Тарскай орто уола Александр Тарскай, куорат 31 №-дээх оскуолатын дириэктэрин солбуйааччы Людмила Кулагина, олимпийскай призер Александр Иванов, куорат олохтоохторо уонна ыалдьыттара, спорт бэтэрээннэрэ кыттыыны ыллылар.

Александр Жирков: «Николай Николаевич Тарскай Саха сиригэр уонна төрөөбүт норуотун ортотугар спорт саҥа көрүҥнэрин олохтуурга уонна сайыннарарга урукку өттүгэр буолбатах киэҥ далааһыннаах үлэни тэрийбитэ, Саха Республикатыгар бүттүүн спортивнай хамсааһыны саҕалаабыта, саха спорда, саха спортсменнара Советскай Союз уонна бүтүн аан дойду таһымыгар тахсалларыгар, улуу түһүлгэлэргэ кыайыылаах-хотуулаах буолалларыгар бастакы олуктарын уурбута. Бэйэтин чаҕылхай олоҕунан-үлэтинэн Саха сиригэр спорт сайдыытын историятыгар үйэлээх эркээйини – бэлиэни хаалларбыта, кини үтүө аата төрөөбүт норуотугар уос номоҕо буолбута», – диэн билиһиннэрдэ.

Этиитин түмүгэр Александр Николаевич, биһиги спортсменнарбыт улахан таһымнаах түһүлгэлэргэ Николай Тарскай тэлбит суолунан тахсаллар, төрөөбүт Сахаларын сирин аатын үрдүктүк туталлар. Николай Николаевич килбиэннээх аата Саха сирин спордун историятыгар, саха спортсменнарын, дьонун-сэргэтин өйүгэр-санаатыгар киэн туттуулаах кэпсэл, уостан түспэт номох буолан кэмтэн-кэмҥэ салҕана, дьулуурдаах, кыахтаах ыччаты саҥаттан саҥа ситиһиилэргэ, үрдүк чыпчаалларга ыҥыра, угуйа туруоҕа диэтэ.

Ити курдук, спорт министрэ Леонид Спиридонов, Н.Н. Тарскай уола Александр Тарскай, Уус Алдан улууһун баһылыгын бастакы солбуйааччы Илья Артамонов – биллиилээх государственнай уонна общественнай деятель, Саха сиригэр физическэй култуура уонна спорт хамсааһынын тэрийбит Николай Николаевич Тарскай үбүлүөйдээх күнүнэн эҕэрдэлээн туран, олоҕун, үлэтин туһунан билиһиннэрдилэр уонна кини аатын үйэтитиигэ туох үлэ ыытылларын эттилэр.

Итинник, Н.Н. Тарскай төрөөбүтэ 100 сылын дьаһаллара киин куоракка сүрдээх көхтөөхтүк, элбэх киһи кыттыылаах тэрээһиннээхтик саҕаланнылар. Бу, Саха сирин чулуу киһитигэр сүгүрүйүү, кини аатыгар ытыктабыллаахтык сыһыаннаһыы уонна кэриэстэбил быһыытынан сыаналанар.

Эбиэттэн киэһэ Саха Республикатын Правительствотын 2 №-дээх дьиэтин актовай саалатыгар Н.Н. Тарскай төрөөбүтэ 100 сылыгар аналлаах “төгүрүк остуол” уонна саҥа бэчээттэнэн тахсыбыт кинигэ сүрэхтэниитэ буолла. Ол туһунан аныгыскы суруйууга…

Петр ПАВЛОВ.

Ааптар видеоҕа уонна хаартыскаҕа түһэриитэ.