Евдокия Избекова, Дмитрий Егоров чемпионнаатылар

Быйылгы юбилейдаах, 80-с төгүлүн ыытыллыбыт Сахабыт сирин саахымакка чемпионата өрө күүрүүлээх үрдүк таһымҥа буолан ааста.

Чемпионат сындылҕаннаах ымпыгын-чымпыгын ааспыт, элбэх күрэхтэһиигэ кыттыбыт оонньооччулар бэйэлэрин кыахтарын, бэлэмнэрин көрдөрөн кииристилэр.

Урукку сылларга лидердэр ураты, туһунан чорбойон – куота баран хаалар, кинилэр эрэ ортолоругар өрүү хатыһыы быһаарыллар буоллаҕына, бу сырыыга оонньооччулар бүтэһик туурга диэри биэтэккэ үктэнэллэригэр тэҥҥэ кэлбиттэрэ, көрөөччүлэр интэриэстэрин тарта, дьон санаатын эппэҥнэттэ.

Бүтэһик оонньууга Дмитрий Егоров Роман Ганжуровы ыга тутан, уустук балаһыанньаҕа хотон, чемпион үрдүк аатын ылла. Киниттэн очко аҥаара хааланнар, коэффициент күүһүнэн ааҕыллан суоттааһыҥҥа Денис Назаров иккис, Айсен Местников туһааннаах үһүс миэстэлэрин үллэһиннилэр.

Дьахталлар ортолоругар Евдокия Избекова алта очколаах, биир туур иннинэ бастаата. Иккис миэстэҕэ тахсыбыт Арина Васильева иккис туурга Полина Пактыын оонньуутугар тэҥнэһэн кэбиһэн, финалга тахсарыгар ити оонньууга сүтэрбит очкотун аҥаара атахтаата. Кини оонньуур таһыма эбиллибитин саахымат тренердэрэ бэлиэтээтилэр. Арина биллэр-көстөр күүстээх саахыматчыттары Ньургуйаана  Баишеваны, Евдокия Избекованы кыайбыта, Туйаара Адамоваттан хотторон сабырыйтарда.

Дьахталлар ортолоругар Евдокия Избекова, Арина Васильева, Ньургуйаана Баишева кыайыылаахтарынан буоллулар.

“Проект для развития интеллектуальных видов спорта” диэн программаны өйөөн “Алмазэргиэнбанк” тэрилтэ генеральнай спорсорынан буолбутун, саахымат оонньуутун биһириир дьон аатыттан улахан махталбытын тириэрдэбит, салгыы үлэлэһэргэ бэлэммитин биллэрэбит.

Бу чемпионат үрдүк таһымҥа ааспыта, Сахабыт сирин саахымакка федерациятын үлэтин биир сүрүн кэрчигэ.

Гаврил ВИНОКУРОВ, чемпионат кылаабынай судьуйата, Бүтүн Россиятааҕы бастакы категориялаах судьуйа.