Лев Павлов – Россия чемпионатын үрүҥ көмүс призера

Россия көҥүл тустууга чемпионата биэс күн ыытыллан түмүктэннэ. Саха сирин хамаандата барыта үс мэтээллэннэ: эр дьон тустуутугар Лев Павлов иккис, Виктор Яковлев үһүс, дьахталлар тустууларыгар Евгения Огородникова үһүс миэстэлэннилэр. Бу, үчүгэй көрдөрүү.

Быйыл састаап эдэрчи. Билэргит курдук, билиҥҥи кэмҥэ опыттаах тустууктарбыт бары кэриэтэ атын дойдулартан тусталлар. Онон Россия иһигэр кыттар хамаандабыт састаабыгар көлүөнэлэр солбуйсуулара буола турар. Буолан ааспыт чемпионакка сүрүннээн эдэрдэрбит кытыннылар уонна түһэн биэрбэтилэр диэххэ сөп.

Ол курдук, соторутааҕыта аҕай, Россия 21-гэр диэри саастаахтарга күрэхтэһиитигэр бастаабыт Лев Павлов биир нэдиэлэ буолаат, аны дойду улахан дьоҥҥо чемпионатыгар кыттан, эриэ-дэхси көрдөрүүлэннэ. Билэргит уонна көрбүккүт курдук, кини бүтэһик быһаарыылаах хапсыһыыга көбүөр опыттаах маастара Ахмед Идрисовка 3:6 ахсаанынан хотторон кэбистэ. Онон үрүҥ көмүс мэтээли ылар чиэскэ тигистэ.

Ханныгын да иһин уолбут үчүгэй өйдөбүлү хаалларда. Инникилээҕин, кэскиллээҕин көрдөрдө.

Лев Павлов бэйэтин телеграм каналыгар: “Сахам сирин болельщиктарыгар, тиhэҕэр диэри эрэммиккит иhин махтал! Бүгүҥҥү сыыhа хамнаныы миигин үчүгэйгэ эрэ тиэрдиэҕэ диэн эрэнэбин. Дьарыкпын өссө күүһүрдүөм, босхо барыам суоҕа. Түүннэри-күнүстэри ханна да буолларгыт өйүүргүт, көрөргүт иhин махтал! Мин итини сыаналыыбын, убаастыбын”, – диэн, ис сүрэхтэн тахсар истиҥ махталын биллэрбит.

Киниэхэ, кырдьык, Россия улахан дьоҥҥо чемпионатыгар бастакы кыттыыта, сүрэхтэниитэ – инники сайдыытыгар улахан үөрүйэх буоларыгар баҕарабыт.

Түгэнинэн туһанан призердаабыт спортсменнарбыт тус тренердэрин: Николай Даниловы, Герман Контоевы, Николай Рожины, Ким Колодезниковы, Саха сирин көҥүл тустууга сүүмэрдэммит хамаандатын сүрүн тренерин эбээһинэһин толорооччу Вадим Семеновы, тустууга бэриниилээх ыалдьааччылары барыларын уо.д.а. эҕэрдэлиибит! Ситиһииттэн уоскуйан хаалбакка, саха спордун былааҕын өрүү күөрэччи көтөҕө сылдьаргытыгар баҕарабыт.

PS: Чемпионат кэккэ түгэннэрин “Дьулурҕан” https://www.youtube.com/channel/UCdQWiPUliiKpPOVV3JKNb5g ютуб каналыгар уонна t.me/dzulurgan телеграм страницатыгар көрүөххүтүн сөп.

Петр ПАВЛОВ.