Сонуннар

«Азия оҕолорун» уота өрүү умайыа

«Азия оҕолоро» VIII спортивнай оонньуулар бэс ыйын 25 күнүттэн от ыйын 7 күнүгэр диэри Дьокуускайга ыытыллыахтара. Олус кыра кэм хаалла. Бэлэмнэнии үлэтэ күүскэ бара турар, спортсменнарбыт сүүмэрдэнэн эрчиллэ, дьарыктана сылдьаллар.

Оонньуубут уота кулун тутар 19 күнүгэр Өлүөнэ очуостарын анныгар саҕыллан, номнуо Саха сирин улуустарын кэрийэ, дьону-сэргэни көҕүлүү сылдьар. Аны 100 хонугунан, оонньуулар аһыллыыларыгар Дьокуускай куораппытыгар төннөн кэлиэҕэ.

2026 сылга, икки сылынан «Азия оҕолоро» оонньуу ыытыллыбыта отут сыла буолуо. Номнуо ааттаах-суоллаах, үрдүк таһымнаах, биллэр тэрээһин буолла. Онтон аан маҥнайгы кэмнэргэ хайдах этэй..?

Мин дьиэтээҕи альбоммар аҕам урукку хаартыскаларын булан көрдүм. 2001 сыл. Манна кини 19 саастаах, үөрэҕин саҥа бүтэрэн оскуолаҕа учууталынан үлэлээри сылдьар. «Азия оҕолоро» оонньуу факелын Ньурба сиригэр арыалдьыт буолан өрө тутан турар. Кини оройуоммут ааттаах спортсменнарын кытары, Ботомоойу үрэхтэн Түүкээн үрэҕэр диэри, оонньуулар уоттарын нэһилиэктэринэн сырытыннаран, Үөһээ Бүлүү делегациятыгар туттарбыттар. Кинилэр уоту Түүкээн үрэҕи тыынан туоратан илдьэ барбыттар. Бэйэтэ кэпсииринэн, «Азия оҕолоро» оонньуулар уоттарын дьон-сэргэ сир аайы үмүөрүһэ, өрө көтөҕүллүүлээхтик көрсүбүттэр.

Биир хаартыскаҕа Үөдэй нэһилиэгиттэн Хаҥаласка диэри арыалласпыт аҕам атастара, номнуо олохтон туораабыт, наставник учууталлара Васильев Владимир Прокопьевич уонна Иванов Василий Тимофеевич факелы өрө көтөҕөн тураллар. Кинилэр өр сылларга нэһилиэккэ, оройуоҥҥа спорт уонна физкультура сайдарыгар сүдү кылааттарын киллэрбиттэрэ. Хаҥалас нэһилиэгэ кинилэр уонна аҕам күүстээх үлэлэринэн, оройуон комплекснай спартакиадатыгар өрүү инники сылдьыбыттар. Аҕам Жданов Леонид Александрович Саха Өрөспүүбүлүкэтин физическэй култуураҕа уонна спорка туйгуна.

Дьыл-кэм баран, олох устан иһиэ – «Азия оҕолоро» уота умайыа.

Анжелина ЖДАНОВА, «Ыллык» пост.

Ньурба, Хаҥалас.

Добавить комментарий

Ваш адрес email не будет опубликован. Обязательные поля помечены *

199063
Бүгүн : 354