Сонуннар

Лев Павлов – Россия чемпиона!

Чечняҕа ыытылла турар Россия 21-гэр диэри саастаах тустууктарга күрэхтэһиитэ биһиэхэ үөрүүнү бэлэхтээтэ. Билиҥҥи кэмҥэ ыччаттарга тумус туттар тустуукпут Лев Павлов 57 киилэҕэ кыайыылаах аатын ылан, биһигини барыбытын сүрдээҕин үөртэ.

Бүтэһик быһаарыылаах хапсыһыыга кини дагестанец Халид Магомедовы 7:4 ахсаанынан баһыйа тутта. Кэнники икки сылга бу бөҕөстөр үһүс көрсүһүүлэрэ. Билэргит курдук, былырыын Дьокуускайга ыытыллыбыт Россия эдэрдэргэ күрэхтэһиитин финалыгар Лев дагестанеһы ыраастык кыайбыта. Онтон быйыл кулун тутар ыйга эмиэ «Өрөгөй» Спорка киинигэр буолбут, сахалартан бастакы олимпийскай чемпион Роман Дмитриев аатынан норуоттар икки ардыларынааҕы турнирга очконан хоппута.

Бу да сырыыга, уолбут утарсааччытын бары өртүнэн баһыйа тутта. Дагестанец кыайбатын билэн, араастаан охсуолаабыта буолан, ыгылыйан ыһа сатаата да, Лев ити угаайыга киирэн биэрбэтэ. Эр санаалааҕын, кыайыыга дьулуурдааҕын уонна киһититтэн тустар таһымынан үрдүк кэрдиискэ турарын өссө төгүл көрдөрдө.

Итинэн Лев Павлов – көҥүл тустууга Россия эдэрдэргэ күрэхтэһиитин икки төгүллээх кыайыылааҕынан буолла. Манан сибээстээн бастатан туран, кини тренердэрин: Семен Павловы, Николай Даниловы, Герман Контоевы эҕэрдэлиибит! Бу кыайыытынан уолбут эдэрдэргэ аан дойду күрэхтэһиитигэр кыттар быраабы ылла.

Бу күн «аччыгый финалга», ол аата, күрэхтэһии боруонса мэтээлин иһин киирсии кыттыылааҕа Василий Григорьев (65 кг) төһө да хоттордор, үчүгэй өйдөбүлү хаалларда. Итиэннэ бочуоттаах бэһис миэстэни ылан, Россия эдэрдэргэ хамаандатын тренердэрин харахтарын далыгар киирдэ диэххэ сөп.

Күрэхтэһии иккис күнүгэр хапсыһыыларын саҕалаабыттартан, 61 киилэҕэ Артем Слепцов уонна Андрей Мидловец бэртээхэй тустууну көрдөрөн, бүгүн иккиэн бастакы миэстэни ким ыларын быһаарсар буоллулар. Онон бу ыйааһыҥҥа «кыһыл көмүс мэтээл» баар диэххэ сөп.

Өссө бүгүн Эдуард Попов 61 кг уонна Роман Николаев 79 кг боруонса мэтээл иһин тустуохтара.

Онон быйылгы түһүлгэҕэ саха уолаттара бэртээхэй көрдөрүүнү ситистилэр. Күрэхтэһии төһө да бүтэ илигин үрдүнэн, тренердэри эҕэрдэлиибит!

Бүгүн хапсыһыылар Дьокуускай бириэмэтинэн 20:00 чаастан саҕаланаллар. Онтон финаллар 22:00 чаастан буолуохтара. Уолаттарбытыгар, хаһан баҕарар буоларыныы, ситиһиилээх тустууну баҕарабыт!

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *

176532
Бүгүн : 98