Хас биирдии хапсыһыы – Парижтааҕы оонньууларга хардыы

Бишкеккэ (Кыргызстан) Азия континенын көҥүл тустууга Олимпиадаҕа сүүмэрдиир күрэхтэһиитигэр биһигиттэн үс бөҕөспүт кыттар. Кыргызстантан Андрей Аронов 97 кг уонна Айаал Лазарев 125 кг итиэннэ быйылгыттан Таджикистан чиэһин көмүскүүр Айаал Белолюбскай 57 кг ыйааһыннарга.

Билэргит курдук, кинилэр ааспыкка Азия чемпионатыгар эмиэ кыттыбыттара. Онно Айаал Лазарев иккис, Андрей Аронов бэһис миэстэ буолбуттара, онтон Айаал Белолюбскай биир эргиир тустубута. Бу сырыыга ааспыттааҕар өссө суолталаах, тыҥааһыннаах, элбэҕи быһаарар күрэхтэһии – Олимпиадаҕа кыттар быраабы ылыы иһин күрэс былдьаһыы.

Бары ыйааһыннарга сэрэбиэй оҥоһуллан таҕыста. Ким кими кытта тустара, ханнык бөлөххө ким баара барыта билиннэ. Аны билигин тустуу эрэ. Үгүстэр, биһиги уолаттарбыт тустарыгар сэрэбиэй хайдаҕый диэн ыйыталлар. Долгуйаллар. Кырдьык, сэрэбиэй кырата суох оруоллаах. Ол эрэн, билигин тустуу аан дойду үрдүнэн сүрдээҕин сайдан турар. Мөлтөх кыттааччы диэн суоҕун тэҥэ. Бары, олимпиец аатын ылларбыт ханнык диэн оҥостон, анаан бэлэмнэнэн кэлэллэр.

57 киилэҕэ 15 бөҕөс күөн көрсөр. Манна бөлөхтөрү тэҥник тэрийиигэ бөҕөстөрү инники ситиһиилэринэн аттаран туруорбуттар. Ол курдук, китаец Зоу уонна индус Аман бөлөхтөрү баһылаабыттар. Узбек Гуломжон Абдуллаев уонна биһиги Айаал Белолюбскайбыт үһүс, төрдүс нүөмэринэн киирбиттэр. Атыттар бары сэрэбиэй быһыытынан киирбиттэр.

Айаал үөһэ бөлөххө иранец А.Мохаммаднеджады кытта тустар буолбут. Бу хапсыһыыга хайалара кыайбыта салгыы күрэхтэһиигэ сэрэйдэххэ, монгол Батхуягы кытта көрсүөн сөп. Чэ бээ, буола илиги эрдэттэн быһаарымыах, көбүөр көрдөрүө. Ылан көрдөххө, састаап добуоччу күүстээх. Кытай, Кырргызстан, Иран, Узбекистан, КНДР, Индия, Казахстан… Дьэ, кинилэртэн икки эрэ киһи Олимпиадаҕа барар быраабы ылыаҕа.

97 кг – 10 кыттааччы. Кыргызстан икки төгүллээх чемпиона Андрей Аронов Туркмения бөҕөһүн кытта киирсэр. Бу хапсыһыы кыайыылааҕын Азия чемпионатын призера казах Алишер Ергали кэтэһэн олорор.

Бу да ыйааһыҥҥа күүстээхтэр элбэхтэр. Ергалины таһынан үөһэ бөлөххө кореец Сео, китаец Хабила, онтон аллараа бөлөххө иранец Азарпира, японец Йошида, монгол Ганбаатар курдук биллэр-көстөр бөҕөстөр бааллар.

Дьэ, ким күүстээҕин көбүөр быһаарыа.

125 кг ыйааһыҥҥа кыттааччылар 12-лэр. Сэрэбиэй быһыытынан китаец Денг бастакы, биһиги Айаал Лазаревпыт иккис нүөмэр буолан, туспа бөлөхтөргө араарыллыбыттар.

Айаал бастакы эргииргэ сынньаммыт. Иккискэ, Ю.Батырмурзаев (Казахстан) – З.Анвар (Пакистан) тустуутун кыайыылааҕын кытта көрсүөҕэ. Манна сэрэйдэххэ Батырмурзаев хоторо буолуо. Өссө бу бөлөххө Бахрейн аатыттан тустар дагестанец Шамиль Шарипов уонна узбек Хасанбой Рахимов бааллар.

Онтон үөһэ бөлөххө китаец Денгы уонна монгол Мунхтуру чорботуохха сөп. Ханныгын да иһин, күрэхтэһии аата – күрэхтэһии, манна спортсмен күүс-уох, өй-санаа өттүнэн хайдах бэлэмнэммитэ быһаарыылаах буолуоҕа. Чуо, бу күҥҥэ, бу чааска ким ордук үчүгэй эрчиллиилээх – ол кыайыаҕа.

Атын да ыйааһыннарга кытаанах киирсиилэр күүтүллэллэр. Ханныгын да иһин хабыр хапсыһыылар буолуохтара. Этэргэ дылы, хас биирдии хапсыһыы – аны сайын Парижка ыытыллар оонньууларга хардыы.

Күрэхтэһии биир күнүнэн ыытыллан түмүктэнэр. Ол аата, сарсыардаттан саҕаланан баран киэһэ бүтэр. Ыйааһын ахсын иккилии путёвка оонньонор. Икки күүстээхтэр ахсааннарыгар киирбэтэхтэр, Олимпиадаҕа сүүмэрдиир бүтэһик күрэхтэһиигэ өссө төгүл холонон көрөр кыахтаахтар. Ол күрэхтэһии ыам ыйын ортото Турцияҕа буолуохтаах.

Хапсыһыылар Дьокуускай бириэмэтинэн күнүс 13:30 чаастан саҕаланаллар. Күрэхтэһии хаамыыта Дьулурҕан dzulurgan.ru сайтыгар уонна t.me/dzulurgan телеграм каналыгар сырдатыллан, көрдөрүллэн иһиэҕэ. Онон кэтээн көрө сылдьыҥ.

«Дьулурҕан».