Анал бириистэргэ кимнээх тигистилэр?

Дьэ, олимпийскай чемпион, ССРС спордун үтүөлээх маастара уонна тренерэ Роман Михайлович Дмитриев кэриэһигэр эдэрдэргэ спортивнай тустууга норуоттар икки ардыларынааҕы турнир түмүктэннэ.

Көрөөччүлэр уонна ыалдьыттар сыаналаабыттарынан, турнир үрдүк тэрээһиннээхтик ыытылынна. Кыргыттарга уонна уолаттарга кыайыылаахтар ааттара билиннэ. Кинилэргэ сиэдэрэй оҥоһуулаах Чемпионнар курдара, эриэккэс мэтээллэр, харчынан бириистэр туттарылыннылар. Кыайыылааҕы бэлэмнээбит трренердэр да умнуллубатылар, харчынан бириэмийэлэннилэр.

Ону таһынан, тэрийээччилэр көҕүлээһиннэринэн бастыҥ бөҕөстөргө элбэх ахсааннаах анал бириистэр ананнылар. Онуоха бастатан туран, сыаналаах анал бириистэри олохтообут спорду, чуолаан көҥүл тустууну өйдүүр, өйүүр тэрилтэлэр бары салайааччыларыгар барҕа махтал буолуохтун!

Быйылгы турнир бастыҥ бөҕөһүнэн – 57 киилэҕэ кыайыылааҕынан тахсыбыт Лев Павлов (тренердэрэ Николай Данилов, Герман Контоев) ааттанна. Киниэхэ Роман Михайлович Дмитриев дьиэ кэргэнэ олохтообут бирииһэ туттарылынна.

Ити курдук, анал бириистэргэ тигистилэр: Лев Павлов, Роман Николаев, Николай Шеглов, Юлиан Григорьев, Николай Захаров, Артём Слепцов, Кирилл Мордовской (бары Саха сирэ), Тамир Ешинимаев (Бурятия), Ксения Тереня (Беларусь).

Петр ПАВЛОВ.

Ааптар хаартыскаҕа түһэриитэ.