Алдан-2024: Барыллааһын түмүк хайдаҕый?

Бүгүн Алдаҥҥа, Спорт кыһыҥҥы көрүҥнэригэр Саха сирин V спартакиадатын бүтэһик түмүктүүр күнэ. Санатан эттэххэ, түөрт сылга биирдэ ыытыллар күрэхтэһиигэ 28 хамаанда кэлэн күрэс былдьаста. Кинилэр, спартакиада балаһыанньатыгар олоҕуран түөрт бөлөххө арахсан күрэхтэстилэр.

Ол курдук, бастакы бөлөххө тоҕус хамаанда кытынна. Кулун тутар 29 күнүнээҕи туругунан Нерюнгри хамаандата 47 мэтээллэннэ. Ол иһигэр 14 кыһыл көмүс, 12 үрүҥ көмүс, 21 боруонса мэтээллэр. Дьокуускай хамаандата билиҥҥитэ 44 мэтээллээх (24+16+4). Ити курдук, алданнар 43 мэтээллээхтэр (18+11+14). Сүрүн миэстэ иһин бу хамаандалар киирсэллэрэ буолуо.

Бу бөлөххө Мэҥэ Хаҥалас куһаҕана суох көрдөрүүлээх – 30 (9+11+10). Мирнэйдэр 15 мэтээллээхтэр. Онтон ньурбалар 4 мэтээллээхтэр.

Иккис бөлөххө 8 хамаанда күрэс былдьаһар. Манна билиҥҥитэ чурапчылар инники иһэллэр. Кинилэр 11 мэтээллээхтэр (4+3+4). Амма хамаандата кинилэри тилэх баттаһан иһэр – 9 мэтээллээх (1+3+5). Үөһээ Бүлүү, Уус Алдан 8-тыы мэтээллээхтэр. Нам 7, Горнай 6 мэтээллээхтэр.

Бу бөлөххө, сэрэйдэххэ, Чурапчы уонна Амма бастакы миэстэни былдьаһар буолуохтаах. Барытын кэнники көрүҥнэр быһаарыахтара.

Үһүс бөлөххө 6 хамаанда баар. Манна Өймөкөөн, Булуҥ, Томпо хамаандалара сүрүн миэстэ иһин киирсэллэр.

Төрдүс бөлөххө 5 хамаанда күрэхтэстэ. Манна Аллайыаха уонна Анаабыр бастакы миэстэни былдьаһаллар.

Бүтэһик күн хайыһарга эстафета быһаарыылаах буолуоҕа.

Бүтэһиктээх түмүк бүгүн киэһэ Спорт кыһыҥҥы көрүҥнэригэр Саха сирин V спартакиадатын үөрүүлээхтик түмүктээһиҥҥэ биллэриллиэҕэ.

Петр Павлов.