«Странджа» бокса турнирыгар…

Любительскай боксаҕа «Странджа» диэн үгэс быһыытынан Болгарияҕа ыытыллар күрэхтэһии – спорт бу көрүҥэр биир улахан таһымнаах турнирынан буолар. Турнир быйыл 75-с төгүлүн ыытыллан түмүктэннэ. Манна биллэр биричиинэнэн Россия хамаандата кыттыбата.

Ыйааһыннарынан кыайыылаахтарынан буоллулар: 48 кг – Анвар Ходжиев (Кыргызстан), 51 кг – Амит Пангал (Индия), 54 кг – Хужаназар Нортожиев (Узбекистан), 57 кг – Сашин Сашин (Индия), 60 кг – Абдумалик Халоков (Узбекистан), 63,5 кг – Радослав Росенов (Болгария), 67 кг – Дулат Бекбаулов (Казахстан), 71 кг – Икболжон Халдаров (Узбекистан), 75 кг – Джавохир Умматалиев (Узбекистан), 80 кг – Танглатихан (Кытай), 86 кг – Богдан Толмачов (Украина), 92 кг – Георгий Кушиташвили (Грузия), 92-тэн үөһэ кг – Джахонгир Зокиров (Узбекистан).

Биһиги билиҥҥи кэмҥэ тумус туттар боксербут, соторутааҕыта Самараҕа ыытыллыбыт Россия Кубогын кыайыылааҕа Василий Егоров муус устар ыйга Белградка (Сербия) буолар Европа чемпионатыгар кыттарга бэлэмнэнэр.

«Странджа» турнирыгар кини кыттар 51 кг ыйааһыныгар индус Амит финалга аан дойду былырыыҥҥы 48 кг чемпиона Санжар Ташкенбайы (Казахстан) 5:0 ахсаанынан баһыйа туппут. Бу ыйааһыҥҥа үһүс бириистээх миэстэлэри турок Самет Гюмюс уонна узбек Асилбек Джалилов ылбыттар. 51 киилэҕэ барыта 15 боксер кыттыбыт.

Буолаары турар Европа чемпионатыгар сыһыаран тутан эттэххэ, Болгария турнирыгар бу ыйааһыҥҥа үс эрэ европеец кыттыбыт: украинец Максим Рудик, армянин Арен Асламазян (иккиэн бастакы эргиир кэнниттэн туораабыттар), онтон турок Гюмюс икки утарсааччытын кыайан баран, финал аҥарыгар индуска хотторбут.

Дьэ, ити курдук, «Странджа» боксаҕа турнирын түмүгүн туһунан кылгастык сырдаттахха.

Петр ПАВЛОВ.