Соһуччу үөрүү! «Дьулурҕан» кэккэтэ хаҥыыр

Бэҕэһээ киэһэ биһиги хаһыаппыт биир көхтөөх көмөлөһөөччүтэ, ааптара Степан Андреев, көхсүлэригэр «Дьулурхан» диэн суруктаах дьон хаартыскатын ыыппытыттан соһуччу көрөн үөрэн, бу хаһан, ханна, кимнээх туралларын туоһулаһан, Аллараа Бэстээххэ эбитин билэммин, аны биир идэлээхпэр, билигин «Парус» спортивнай комплекска салайааччынан үлэлиир Дьулус Захаровы кытта кэпсэтэн билбитим, ити «Дьулурхан» диэн мадьынылар бөлөхтөрүн аата эбит.

Салгыы токоолоһон билбитим, ити ааты Афанасий Платонов диэн, «Парус» үлэһитэ ааттаабыт. Дьэ, онон аны кинини булан, тутатына ыйыталастым.

-Үтүө киэһэнэн, Афанасий! Бу «Дьулурҕан» хаһыаттан Павловпын. Кэлэн иһэринэн эҕэрдэ!, – диэн баран, тоҕо футболкаҕа чуолаан итинник ааты суруммуттарын сурастым.

Онуоха Афанасий: «Бу ааты иҥэрбитим диэн маннык, алтынньы 27-гэр уолламмытым. Оҕобун Дьулурхан диэн аатаабытым. Уонна ити бииргэ эрчиллэр дьоммун кытта сүбэлэһэн баран, итинник ааты ыларга сөбүлэспиппит. Тоҕо диэтэргит, алтынньы 26 күнэ – Саха сиригэр спорт төрүттэммит 100 сыла, онон уолум спорка дьулуурдаах буоллун диэн, Дьулурхан диэн ааттаабытым. Итинник ааттаах хаһыат баар билэбин бөҕө буоллаҕа. Оҕо эрдэхпиттэн аахтахпыт дии».

Санатан эттэххэ, Платонов Афанасий Андреевич мас-рестлиҥҥэ Саха сирин уонна Россия спордун маастара. Республика, Россия, Европа, аан дойду чемпиона, Манчаары оонньууларын кыайыылааҕа. Билигин Аллараа Бэстээххэ ЖКХ скважинатын оператора, ону тэҥэ «Парус» спорткомплекска харабылынан үлэлиир эбит. Мас-рестлининэн дьарыктанар, атыттары көҕүлүүр.

Дьэ, ити курдук, «Дьулурҕан» диэн хаһыат тахсыаҕыттан, биһиги республикабытыгар хас даҕаны ыал бэйэлэрин уолаттарын итинник ааттаабыттара – биһиэхэ үөрүүлээх да, киэн туттуулаах даҕаны диэхпин баҕарабын. Өссө 2000 сылларга Уус Алдан улууһун «Лена» сопхуоһугар Дьулурҕан диэн сүүрүк сылгы баара, син ситиһиилээхтик кыттыбыта. Ыттарын Дьулурҕан диэн ааттаабыттар да баалларын билэбит…

Түгэнинэн туһанан, Афанасий Андреевичка махтанабыт уонна кыра уол туһалаах, бэйэтин аатыгар дьүөрэлии олоххо дьулуурдаах буоларыгар баҕарабыт! Онтон “Дьулурхан” мадьынылар бөлөхтөрүгэр ситиһиилэри, кыайыылары!

Петр Павлов, «Дьулурҕан» хаһыат редактора.