ДЮСШ-3 25 сыла: Бастыҥнар наҕараадаланнылар

Бүгүн, Саха Республикатын Правительствотын 2-с №-дээх дьиэтин актовай саалатыгар В.П. Керемясов аатынан Дьокуускай куорат 3 №-дээх спортивнай оскуолатын 25 сыллаах үбүлүөйүн үөрүүлээхтик бэлиэтээһин буолла.

Кэрэ бэлиэ түгэн Учуутал күнүгэр түбэспитэ, тэрээһини өссө киэргэттэ. Манна Саха сирин физическэй культураҕа уонна спорка министрэ Леонид Спиридонов, Ил Түмэн депутата Геннадий Васильев, Хотугулуу Илиҥҥи федеральнай универститет физическэй культураҕа уонна спорка институтун дириэктэрэ Николай Гоголев, Дьокуускай куорат мунньаҕын депутата Евдокия Евсикова, киин куорат физическэй культураҕа уонна спорка управлениетын начальнига Эдуард Ефимов, Дьокуускай куорат оскуолаларын уонна спорка кыһаларын дириэктэрдэрэ уо.д.а. кыттыыны ыллылар.

Үөрүүлээх чааска кинилэр үбүлүөйдээх коллективы эҕэрдэлээн туран, үлэ бастыҥнарыгар наҕараадалары туттардылар. Ол курдук, тренер Станислав Афанасьевка «Саха Республикатын физическэй культураҕа уонна спорка туйгуна» анал бэлиэ туттарылынна. Тренердэр Никита Никифоров уонна Иван Соркомов “Дьокуускай куорат физическэй культурата уонна спорда сайдыытыгар кылааттарын иһин” бэлиэнэн бэлиэтэннилэр. Ити курдук, бастыҥ үлэлээхтэр – Махтал суруктарынан, Бочуотунай грамоталарынан, анал бэлиэлэринэн, кубоктарынан наҕараадаланнылар.

Бу кэм устата Дьокуускай 3 №-дээх спортивнай оскуолатын иитиллээччилэрэ – көҥүл тустууга Саха сиригэр, Дальнай Восток зонатыгар, Россияҕа, Европаҕа уонна аан дойду күрэхтэһиилэригэр кэккэ ситиһиилэннилэр. Ол курдук, аҥардас Россия түһүлгэтиттэн 101 кыһыл көмүс, үрүҥ көмүс уонна боруонса мэтээллэр ситиһилиннилэр.

Биллэн турар, оскуола сүрүн сыалынан – киин куоракка оҕолор ортолоругар көҥүл тустууну сайыннарыы, спордунан ситимнээхтик дьарыктанан эти-хааны чэбдигирдии, дойдуга туһалаах дьон буола улаатан тахсалларыгар иитии буолаллар.

Василий Васильевич Уйгуров дириэктэрдээх В.П. Керемясов аатынан Дьокуускай 3 №-дээх спортивнай оскуолатыгар билигин күүстээх састаап, коллектив мустан тиритэ-хорута айымньылаахтык үлэлии-хамсыы сылдьар диэххэ сөп. Кинилэр ортолоругар үтүөлээх тренердэр, бочуоттаах үлэһиттэр уонна эдэр специалистар аҕыйаҕа суохтар.

Тустуу кыһатын инники соруктара дьэҥкэ, ону коллектив бэйэтин айымньылаах үлэтинэн толорорго дьулуһар.

Петр ПАВЛОВ.

Ааптар хаартыскаҕа түһэриитэ.