Бүтэйдээххэ бэлиэ түгэн

Ааспыт нэдиэлэҕэ, алтынньы ый 7 күнүгэр, өр сылларга Бүтэйдээх орто оскуолатыгар физкультура учууталынан үлэлээбит Александр Васильевич ИГНАТЬЕВ 85 сааһын бэлиэтээһин уонна “Олоҕум кэрдиис кэмнэрэ” диэн оҕолоро таһаартарбыт кинигэлэрин сүрэхтэниитэ – оскуола 130 сылын бэлиэтээһин чэрчитинэн ыытылынна.

Александр Васильевич уонна кини кэргэнин, эмиэ физкультура учууталын, Филиада Дмитриевна Игнатьева ааттара Мэҥэ Хаҥалас улууһун Бүтэйдээх оскуолатын физкультурнай саалатыгар иҥэрилиннэ.

Улуус биир бастыҥ, үрдүк таһаарыылаахтык үлэлээбит, үөрэппит оҕолорун уонна бииргэ үлэлээбит коллегаларын, төрөппүттэр дириҥ убаастабылларын ылбыт, 40-ча сыл эҥкилэ суох үлэлээбит учуутал туһунан элбэх истиҥ санаалар, махтал тыллара этилиннилэр, олоҕун кэрдиис кэмнэрин туһунан иһирэх ахтыылар оҥоһулуннулар.

Александр Васильевичка доруобуйаны, тапталлаах Бүтэйдээҕэр оҕолорун тапталларыгар бигэнэн өссө уһуннук, дьоллоохтук олороругар баҕардылар.

Афанасий ИЛЛАРИОНОВ.