Александр Румин – аан дойду чемпионатын боруонса призера

Греция Лутраки куоратыгар аҕам саастаах тустууктар аан дойдуга бастыыр иһин чемпионаттара ыытылла турар.

Бу, Тустуу аан дойдутааҕы түмсүүтэ (UWW) үгэс быһыытынан ыытар күрэхтэһиитигэр быйыл Саха сириттэн аатырбыт хапсаҕайдьыт, аҕам саастаахтарга Россия көҥүл тустууга быйылгы чемпиона Александр Румин соҕотоҕун тиийэн кытынна. Итиэннэ, сахалар ааттарын түһэн биэрбэтэ, тустуулаах омук буоларбытын итэҕэттэ.

Сиһилии соҕус билиһиннэрдэххэ, Александр Румин кыттыбыт 51-55 саастаахтар бөлөхтөрүгэр 100 кг ыйааһыннаахтарга барыта 13 бөҕөс туһунна. Өссө тустуу инниттэн, бу ыйааһыҥҥа сайаапканы көрөн баран, састаап күүстээх эбит дии санаа, сэрэхэдийии баара. Эдэрдэригэр – Олимпиада, аан дойду, Европа чемпионаттарыгар, онтон кэлин сааһыран да баран бэтэрээннэр тустууларыгар ситиһиилээхтик кытта сылдьар Эльдар Куртанидзе (Грузия), Чинарбек Изабеков (Кыргызстан), Игорс Самушонокс (Латвия) бааллара.

Биһиги бөҕөспүт – аҕам саастаахтарга көҥүл тустууга улахан таһымҥа бу иккис күрэхтэһиитэ. Бэс ыйыгар Смоленскайга Россия чемпионатыгар күүһүн аан бастаан холонон, тэҥнээҕин булбатаҕа. Бу кыайыытыттан сиэттэрэн, аны аан дойду чемпионатыгар кыттарга сыал-сорук туруоруммута.

Лутраки көбүөрүгэр сэрэбиэй быһыытынан, Александр күрэхтэһиини финал чиэппэриттэн саҕалаабыта. Онно, бу иннинэ Саудовскай Аравия бөҕөһүн хоппут дьоппуон Сакакибараны 6:0 ахсаанынан кыайбыта. Ол кэмҥэ кини бөлөҕөр баар Куртанидзе – монгол бөҕөһүн 4:4 ахсааҥҥа, хаачыстыбанан баһыйан хоппута.

Салгыы, сэрэбиэй быһыытынан, финалга тахсар иһин киирсиигэ Александр – бу түһүлгэ саамай улахан ааттаах-суоллаах тустуугун – икки төгүллээх олимпийскай призер, аан дойду 2, Европа 5 төгүллээх чемпиона, бэтэрээннэргэ аан дойду чемпионатын икки төгүллээх чемпиона грузин Эльдар (Лука) Куртанидзены кытта таҕыста. Итиэннэ улахан аатыттан-суолуттан толлубакка харса суох киирсэн, бүтэһик мүнүүтэҕэ диэри (бэтэрээннэр 2-лии мүнүүтэ икки түһүмэх тусталлар) 2:1 ахсаанынан хотон иһэн, Куртанидзе киитэрэй хамсаныытыгар киирэн биэрэн, ахсааны кыл мүччү тэҥнэтэн (2:2) кэбистэ. Онон быраабыла быһыытынан, баалы кэнники ылбытынан, кыайыы грузиҥҥа бэрилиннэ. Дьэ, кыһыылаах! Кыра тиийбэтэ. Биһиги бөҕөспүт да финалга тахсар кыахтааҕа. Барыта опыт быһаарда.

PS: Александр Румин тустууларын “Дьулурҕан” телеграмҥа каналыгар көрүөххүтүн сөп.

Онон бөҕөспүт боруонса мэтээл иһин киирсэр буолла. Онно монгол бухатыыра Сухбат Агваансамданы 6:0 ахсаанынан кыайан, бэтэрээннэргэ аан дойду чемпионатын үһүс призерунан буолла.

Онтон бу ыйааһын быһаарыылаах хапсыһыытыгар Игорс Самушонокс – Эльдар Куртанидзены 3:1 ахсаанынан кыайан, чемпионнаата. Самушонокс туһунан эттэххэ, кини өссө 1990 сыллаахха, Игорь Самушонок (омугунан нуучча) эрдэҕинэ, көҥүл тустууга юниордарга аан дойду чемпиона этэ. Онтон 1992 сыллаахха Латвия хамаандатыттан Европа эдэрдэргэ күрэхтэһиитигэр кыайбыта, 1999 сыллаахха Европа чемпионатын үрүҥ көмүс призера, 2000 сыллааҕы Олимпиада кыттыылааҕа.

100 кг: 1. Игорс Самушонокс (Латвия), 2. Эльдари Куртанидзе (Грузия), 3. Александр Румин (Россия, Саха сирэ), Чынарбек Изабеков (Кыргызстан).

Александр Румины, бу дьоһун ситиһиитинэн эҕэрдэлиибит! Кини спорка уһун үйэлэнии үтүө холобурун көрдөрөр. Итиэннэ, спортсмен хаһан баҕарар бэйэтин иннигэр сыал-сорук туруорунан дьаныардаахтык дьарыктаннаҕына, ханнык баҕарар көрдөрүүнү ситиһиэн сөптөөҕүн итэҕэттэ. Барыта, киһиттэн бэйэтиттэн тутулуктаах.

Сахата суох – тустуу суох, тустуута суох – саха суох!

Петр ПАВЛОВ.