“Учууталым илиитэ” Чурапчыга сүрэхтэннэ

Бу күннэргэ билэрбит курдук өрөспүүбүлүкэ бүттүүнэ Саха АССР, РСФСР, ССРС үтүөлээх тренерэ, Саха АССР үтүөлээх учуутала, Олимпийскай оонньуулар, Аан дойду, Европа уонна ССРС чемпионнарын иитэн-үөрэтэн таһаарбыт улуу тренер Дмитрий Петрович Коркин төрөөбүтэ 95 сылын киэҥник бэлиэтиир үбүлүөйүгэр анаан биир бастакы иитиллээччитэ Республика көҥүл тустууга чемпиона, РСФСР 1971 с. үһүс миэстэлээҕэ, ССРС спордун маастара, дуобакка ССРС спордун маастарыгар кандидат, РСФСР норуотун үөрэҕириитин туйгуна, Саха Өрөспүүбүлүкэтин үөрэҕириитин үтүөлээх үлэһитэ Петр Николаевич Калачев “Учууталым илиитэ” кинигэтэ Чурапчыга киин библиотекаҕа сүрэхтэннэ.

Тэрээһини библиотека үлэһитэ Кузьмина Марфа Николаевна хомоҕой тылларынан иилээн-саҕалаан ыытта.

Бастаан тылы Петр Николаевич ылла. Кини: “…Кини ситиһиилэрэ хатыланыахтааҕар ситэ үөрэтиллэ иликтэр, кини ситиспит чыпчаала – үс Саха уола Монреаль Олимпиадатын пьедесталыгар үс мэтээллээх тахсан турбута устуоруйа дьоллоох түгэнин курдук хаалла. Ол иһин кини олоҕун сырдатыыга кыра да түгэн умнууга хаалбакка, сырдатыллан, кини олоҕор, үлэтигэр көрсүбүт ыарахаттара, быһаарсыбыт кыһалҕалара чиэһинэйдик ырытыллан, аһаҕастык этиллэн, кырдьыктаахтык сурулуннахтарына эрэ туох эмэ туһалаах буолуо этэ. Ол иһигэр кини сорох табаарыстарын, доҕордоһо сылдьыбыт дьонун алҕастара, аһары түһэриитэ суох, өйдөнүөхтэрин наада. Ол иһин, ол кэминээги олох-дьаһах балаһыанньатын суруйдум… Мин Дмитрий Петрович тапталлаах кэргэнин Александра Семеновнаны эдэр сааспыттан билэрбинэн, ону таһынан отучча сыл ыаллыы олорор буоламмын, сайын аайы кини кыыһынаан Геялыын куораттан сайылыы таҕыстахтарына элбэхтэ кэпсэтэн, бу суруйуу кини санааларыгар сөп түбэһэригэр эрэнэбин“, – диэн эттэ.

Кырдьык, билигин санаатахха, кинигэ биһиги көлүөнэ олоҕо-дьаһаҕа мөлтөҕүн, оччотооҕу 60-70 сс. олох усулуобуйата, арыгы бүрүүкээбит кэмин, Д.П. Коркин ыарахан балаһыанньаҕа үлэлээбитин, баары-баарынан Петр Николаевич кырдьыгынан суруллубутун биир бэйэм ылынабын.

Кинигэ сүрэхтэниитигэр кэлбиттэртэн: педагог, урукку кэмнэргэ оройуоҥҥа биллэр спортсмен, салайааччы Виталий Михайлович Неустроев, уруккута оройуон биллиилээх спортсменнара уонна улуу тренердэрин суолун салҕаан үлэлээбит, үлэлии сылдьар ССРС уолаттарга чемпиона, Чурапчы улууһун уонна Арыылаах нэһилиэгин бочуоттаах гражданина Семён Семёнович Морфунов, ССРС уолаттарга чемпиона, Аан дойдуна үһүс миэстэлээх улуус уонна Чакыр нэһилиэгин бочуоттаах олохтооҕо Семён Прокопьевич Макаров, тренерэ Д.П. Коркин аатынан, Албан аат музейын дириэктэрэ Егор Васильевич Пудов, үөрэх салаатын профсоюһун председателэ Егор Иннокентьевич Давыдов, Чурапчы нэһилиэгин специалиһа Мария Петровна Матвеева уонна мин, уо.д.а эҕэрдэ тыллары, сэмэй бэлэхтэри, туоһу суруктары туттартаатылар.

Д.П. Коркин сырдык аатын үйэтитиигэ үгүс үлэ ыытыллыбыта уонна ыытыллар. Кини аатынан Чурапчытааҕы оҕо спортивный “Олимпийскай эрэл” оскуолата үлэлиир, кини аатынан уулусса баар, киинэлэр уһуллубуттара, уһуллаллар, испэктээх туруордулар, кинигэлэр тахсаллар, төрөөбүтэ 95 сылыгар анаан үөрэнээччилэрэ П.П. Пинигин “Мой учитель Дмитрий Коркин. Путь к триумфу”, П.Н. Калачев ” Учууталым илиитэ”,  С.П. Макаров “Биһиги Коркин уолаттарабыт” диэн кинигэлэр күн сирин көрдүлэр. Сылын ахсын Дьокуускай куоракка норуоттар икки ардыларынааҕы “Гран-При” турнир, быыстапкалар, научнай-практическай конференциялар, ааҕыылар тэриллэллэр. Ити курдук биһиги ытыктыыр сүдү киһибит аата үйэтитиллэриттэн махтанан туран үөрэбит.

Петр Николаевич түмүк тылыгар кэлбит дьоҥҥо махталын биллэрдэ, доруобуйаны, этэҥҥэ буолууну баҕарда.

Аны Пекиҥҥэ уон сыл саха оҕолорун көрөн-истэн циркэ диэн уустук көрүҥҥэ үөрэттэрбитин туһунан өссө интириэһинэй кинигэни суруйарга былааннанар.

Былатыан КУОРКУН, үлэ, спорт бэтэрээнэ.

Чурапчы.