Сонуннар

Ситиһиилэртэн сэргэхсийиэххэйиҥ, кыайыылартан үөрүөххэйиҥ!

Саҥа үөрэх сыла саҕаланан эрчиллиилэр, дьарыктар буолуталаан, быйылгы сыллааҕы күрэхтэр былааҥҥа кииртэлээн сыаллаах-соруктаах үлэ саҕаланна. 2023 сылга спорт сонуннарыгар чаастатык ааттаммыт, кэккэ ситиһиилэрдээх, кыайыылардаах Айтал Санников толкуй, ыраҥалааһын, сүбэлэһии-сөбүлэһһии кэннэ Мэҥэ-Хаҥалас улууһугар Хара нэһилиэгэр спортивнай оскуолаҕа үөрэнэ киирдэ.

Бу күннэргэ Бурятияҕа Иволгинскайдааҕы Физкультурнай-чэбдигирдэр комплекска боксаҕа сэбиэскэй кэмнээҕи чаҕылхай сулус, ССРС спордун маастара, норуоттар икки ардыларынааҕы кылаастаах маастар Зориктуев Борис Жамьянович кэриэһигэр анаммыт улахан күрэхтэһии буолан ааста. Күөн көрсүһүүгэ Монголияттан, Бурятияттан, Саха сириттэн уонна  Забайкальскай кыраайтан түмсэннэр умнуллубат түгэннэри оҥордулар.

Сахабыт сирин чиэһин Мэҥэ-Хаҥалас оҕо спортивнай оскуолатыттан 4 оҕо баран көмүскээтэ. Уолаттар сүрдээх таһаарыылаахтык кытыннылар. Ол курдук, 4 киһиттэн – үһэ кыайыылаах, биирэ призер буолла. Айтал Санников бу иннинээҕи араас таһымнаах күрэхтэргэ ситиһиилээхтик кыттыбытын салҕаата – 66 киилэ ыйааһыннаахтарга кыайда!

Манна даҕатан эттэххэ, Айтал сайын эмиэ сүрдээх дьаныардаахтык, сыаллаахтык-соруктаахтык дьарыктаммыта, сүүрбүтэ-көппүтэ, тириппитэ-хоруппута. Онон ситимнээх үлэ ситиһиилэрэ салҕанар. Айталы кытта В.Бродников, С.Сергучев, Ж.Павлов бараннар, эмиэ кыайыы көтөллөөх кэллилэр. Хамаанданы тренердэрэ ааттаах-суоллаах, ситиһиилээх, үрдүк көрдөрүүлээх үлэһит, СӨ үтүөлээх тренерэ Василий Шестаков салайан илдьэ сырытта. Бу күрэххэ Арассыыйа таһымнаах судьуйа Ариан Монастырев үлэлэспитэ туһугар эмиэ ситиһии.

7 нүөмэрдээх Хатас спортивнай оскуолата быйыл 20-с сылын үлэлиир. Тустуу кылааһа аһыллыаҕыттан баар. Клиҥҥи сылларга баар балаһыанньаҕа (залбыт саҥа тутулла сылдьар, эрчиллэргэ усулуобуйа ыарахаттардаах) бэрии бэрдэрбэккэ, ыарахаттартан иҥнибэккэ ситимнээх үлэ барарын, түбүктээх үлэ түмүктээх буолуутун биир чаҕылхай туоһута бу күннэргэ буолла. ССРС спордун маастара Борисов Борис Борисович сырдык аатын үйэтитиигэ анаммыт өрөспүүбүлүкэтээҕи аһаҕас турнирга 6 оҕо кыттыбыттан 3 оҕо – 38 кг Новиков Артем кыһыл көмүс мэтээли, 32 кг Попов Андрей уонна 75 кг Ноговицын Саша үрүҥ көмүс мэтээли ылары ситистилэр.

Новиков Артем “Бастыҥ техникатын” иһин диэн номинациянан анал бириис тутта, анал бириис ылла. Тренер Александр Павлович Осипов сөптөөх суолу тутуспутун бу кыайыылар бэрт чуолкайдык көрдөрөллөр. Александр Павлович оҕолору кытта тэҥҥэ кинилэр төрөппүттэрин кытта өй-санаа, көмө-тирэх чааһыгар үлэлэһэн, киниэхэ дьарыктанар түмсүү бэйэтэ биир улахан иллээх-эйэлээх дьиэ-кэргэн курдуктар. Бу көстүү ситиһиигэ төһүү күүс буолара мөккүөрү үөскэппэт.

Спортивнай оскуола аһыллыаҕыттан сүрүн хайысхалартан биирдэстэрэ тустууну кытта эр-биир таһымҥа турар мас тардыһыыта буолар. Бу көрүҥҥэ ааттаах-суоллаах, ситиһиилэрдээх, Арассыыйа таһымыгар тиийбит үтүө түмүктэрдэхпит. Бу көрүҥҥэ үс көлүөнэ тренердэр – Е.Е. Гоголев үөрэннэччитэ Баишев А.М., Баишев А.М. үөрэнээччитэ Евсеев Г.Ф. бииргэ үлэлии сылдьаллара эмиэ элбэҕи кэпсиир. Бу күннэргэ Анапа куоракка Араассыыйа таһымнаах турнирга Ефремов Артём үрүҥ көмүс мэтээллээх кэллэ.

Бэрт сотору өр сылларга ыра санаа оҥостубут спортивнай саалабыт аанын тэлэччи аһыаҕа, онно маннык дьоһун ситиһиилэрдээх кэлэрбит чэгиэн-чэбдик олох туругурар суолун тобулуубут буоллаҕа.

Наталья РУФОВА, Хатас.

Добавить комментарий

Ваш адрес email не будет опубликован. Обязательные поля помечены *

176521
Бүгүн : 87