Белград-2023: Уолаттарбыт кимнээҕи кытта тусталларый?

Дьэ, күүппүт күрэхтэһиибит – көҥүл тустууга быйылгы сыл саамай быһаарыылаах уонна тыҥааһыннаах түһүлгэтэ – аан дойду чемпионата саҕаланар күнэ үүннэ. Быйылгы чемпионат уратытынан, эһиил Парижка буолуохтаах сайыҥҥы Олимпийскай оонньууларга кыттааччылары сүүмэрдээһин буолар.

Ол курдук, олимпийскай ыйааһыннарга хас биирдиилэригэр 5-тии бастыҥ көрдөрүүлээх бөҕөстөр олимпийскай путёвканы ылыахтара. Ол аата, түөрт бастыҥнар уонна боруонса мэтээллэри ылыыга хотторбуттар сирэй көрсөн, бэһис путёвканы былдьаһыахтара.

Дьэ, маннык эппиэттээх күрэхтэһиигэ саха тустууга кыһатын алта иитиллээччитэ кыттар. Өссө Арыйаан Тютрин (Беларусь, 57 кг) кыттыахтаах этэ да, эрчиллии кэмигэр эчэйии ылан – кыттыбат буолбута хомолтолоох.

Сэрэбиэй быһыытынан Владимир Егоров (Хотугу Македония, 57 кг) – грузин Р.Дингашвилины, Андрей Бекренев (Беларусь, 61 кг) – армянин Н.Арутюняны, Николай Охлопков (Румыния, 61 кг) – россиянин А.Магомедовы, Ньургун Скрябин (Беларусь, 65 кг) – армянин В.Теваняны, Георгий Окороков (Австралия, 65 кг) – китаец Ян уонна азербайджанец Х.Алиев пааратын кыайыылааҕын кытта, Айаал Лазарев (Кыргызстан, 125 кг) – албанец П.Карепины кытта тустуохтара.

Сэрэбиэй куһаҕана суох диэххэ сөп. Уолаттар киирсиэхтээхтэр, ким бэйэтин суолун солоон, ким бастыҥ бөҕөс суолун батыһан…

Бүгүн, чемпионат бастакы күнүгэр – 61, 70, 86, 125 кг ыйааһыннаахтар тусталлар.  Онтон 79, 92, 57, 74 кг – сарсын, 65 уонна 97 кг – өйүүн тустуохтара.

Хапсыһыылар бүгүн Дьокуускай бириэмэтинэн 17:30 саҕаланаллар.

«Дьулурҕан».