Белград-2023: Бүгүн икки уолбут тустар

Сербия киин куоратыгар көҥүл тустууга аан дойду чемпионата үгэннээр бара турар. Бөөлүүн түөрт ыйааһыҥҥа бастакы чемпионнар уонна призердар кимнээх буолаллара быһаарылынна.

Бастаан, бырагыраама быһыытынан «уоскутар» бөлөх тустуулара ыытылынна. Онуоха 61 киилэҕэ, финалист Абасгаджи Магомедовка (Россия) хотторбут Николай Охлопков китаец Ли Вейы кытта кииристэ. Санаабытыгар дьэ манна, Николай бэйэтин өйүн-санаатын түмэн, күүһүн-уоҕун хомунан тустуо диэбиппит, китаец киһибитин киһилээбэтэ, партерга түһэрэн баран араастаан эргитэн, очукуонан ыраастык кыайда.

Бу күн биһигиттэн, Хотугу Македония хамаандатыттан тустар Владимир Егоров (57 кг) күрэхтэһиитин саҕалаата. Владимир маҥнай грузин Р.Дингашвилины 4:2 ахсаанынан кыайан баран, салгыы тустууга Европа чемпиона, аан дойду чемпионатын призера А.Арутюняҥҥа (Армения) 0:11 хоттордо. Санаабытыгар салгыы күрэхтэһиигэ армян финалга тахсарын кэтэстибит даҕаны, кини быһаарыылаах хапсыһыыга сүрдээх бырахсыылаах, аһаҕас тустууга японец Хигучига 16:18 ахсаанынан сабырыйтаран, биһиги эрэлбитин барыта сотуллан таҕыста.

Аны бүгүн, чемпионат үһүс күнүгэр 65 уонна 97 кг ыйааһыннаахтар күрэхтэһиини саҕалыыллар. Биһигиттэн, Беларусь чиэһин көмүскүүр Ньургун Скрябин (65 кг) – Европа быйылгы чемпиона Вазген Теваняны кытта тустуоҕа. Онтон Австралия аатыттан кыттар Амма ыччата Георгий Окороков – китаец Ли уонна азербайджанец Хаджи Алиев пааратын кыайыылааҕын кытта көрсүөҕэ.

Чемпионат хапсыһыылара Дьокуускай бириэмэтинэн киэһэ 17:30 саҕаланаллар.

«Дьулурҕан».