Тустууктарбыт уон мэтээллэннилэр

Атырдьах ыйын 24-26 күннэригэр Екатеринбург куоракка, Студеннар спортарын норуоттар икки ардыларынааҕы фестивалын спортивнай тустууга күрэхтэһиитэ ыытыллан түмүктэннэ. Манна Саха сирин студеннара уон мэтээли ылан, эриэ-дэхси көрдөрүүнү ситистилэр.

Ол курдук, М.К. Аммосов аатынан ХИФУ хамаандатыттан Алексей Копылов бастакы, Александр Авелов, Никита Хабаров иккис, Станислав Свинобоев, Никита Софронов, Максим Толмачев үһүс миэстэлэри ыллылар.

Онтон Чурапчытааҕы физическэй культура уонна спорт институтуттан Александра Карамзина иккис, Севиль Назарова, Любомир Ашеин уонна Ньургун Терентьев үһүс миэстэлэннилэр.

Ити курдук, биһиги республикатыттан тустууктары тэҥэ өссө дзюдоҕа Аина Моисеева иккис, самбоҕа Ольга Лихота үһүс миэстэлэри ылбыттара. Онон Екатеринбургдааҕы фестивальга студеннарбыт барыта 12 мэтээллэннилэр.

Көстөрүн курдук, ордук тустууктарбыт сэргэхситтилэр. Кинилэр бу таһымнарын намтаппакка, улуу тренер Дмитрий Петрович Коркин төрөөбүтэ 95 сылыгар аналлаах Чурапчыга ыытыллар монголлары кытта табаарыстыы көрсүһүүгэ уонна Дьокуускайга буолар норуоттар икки ардыларынааҕы турнирга ситиһиилээхтик тусталларыгар баҕарабыт.

Манна даҕатан эттэххэ, эһиил биһиги республикабыт киин куоратыгар көҥүл тустууга Россия студеннарга чемпионата ыытыллара былааннанар. Онно бэлэмнэнии, хамаанданы сүүмэрдээһин эрдэттэн тэриллэрэ эрэйиллэр.

Эр дьоҥҥо көҥүл тустууга күрэхтэһии түмүк көрдөрүүтэ:

57 кг: 1. Алексей Копылов (Россия), 2. Доктурбек Юхан Уулу (Кыргызстан), 3. Микита Савицкай (Беларусь), Любомир Ашеин (Россия).

61 кг: 1. Бекболот Мырзаназар Уулу (Кыргызстан), 2. Александр Авелов, 3. Ньургун Терентьев, Кежик Седен (үһүөн – Россия).

65 кг: 1. Кежик Монгуш, 2. Даниил Боднар (иккиэн – Россия), 3. Сейед Фардин Хейдари (Иран), Турбаяр Давааньям (Монголия).

70 кг: 1. Чаян Монгуш, 2. Сармат Бестаев (иккиэн – Россия), 3. Сабир Джафаров (Азербайджан), Магомед-Эми Эльтемиров (Россия).

74 кг: 1. Магомет Карданов (Россия), 2. Рамис Хасанов (Азербайджан), 3. Станислав Свинобоев (Россия), Мохаммад Реза Аскарпур (Иран).

79 кг: 1. Халид Яхиев (Россия), 2. Амир Реза Тахерхани (Иран), 3. Шамсат Таир (Казахстан), Михаил Сотников (Россия).

86 кг: 1. Абдула Цацаев (Россия), 2. Хамун Махмуджанлу (Иран), 3. Фарид Джаббаров (Азербайджан), Бекзат Рахимов (Россия).

92 кг: 1. Алихан Кцоев, 2. Берд Кусов, 3. Никита Софронов, Абдула Абдулгасанов (бары – Россия).

97 кг: 1. Карденас Йосеньки Кастанеда (Куба), 2. Ирбег Тавгазов (Россия), 3. Мохаммадали Азарпира (Иран), Максим Толмачев (Россия).

125 кг: 1. Салар Хабиби (Иран), 2. Никита Хабаров (Россия), 3. Айдын Ахмадов (Азербайджан).

«Дьулурҕан».