Сонуннар

«Боотурдар оонньууларыгар» кимнээх кыайдылар?

Атырдьах ыйын 16-20 күннэригэр республикабыт киин куоратыгар көҥүл тустууга сахалартан аан дойду бастакы чемпиона Илларион Федосеев сырдык аатыгар анаммыт «Боотурдар оонньуулара» ыытыллан түмүктэннэ.

Бу күрэхтэһии биир аналынан, эһиил буолуохтаах «Азия оҕолоро» норуоттар икки ардыларынааҕы спортивнай оонньуулар иннилэринэ бастыҥнары көрүү, талыы буолла.

«Боотурдар оонньуулара» саастарынан араарыллыбыт түөрт бөлөҕүнэн (2009-2010, 2007-2008, 2011-2012, 2013-2014 сс. төрөөбүттэр) ыытылынна. Хапсыһыылар «Модун» спортивнай комплекска, В.П. Керемясов аатынан куорат 3 №-дээх спортивнай оскуолатын тустууга саалатыгар уонна Дьокуускай 25 №-дээх оскуолатыгар буоллулар.

Холобур, «Модуҥҥа» 2013-2014 сс. төрөөбүттэр күөн көрүстүлэр. Бу саастаах оҕолорго көбүөргэ барыта 221 эдэр бөҕөс таҕыста. Күрэхтэһии кылаабынай судьуйатынан Дьулустан Сивцев, онтон кылаабынай секретарынан Андриан Захаров үлэлээтилэр.

Оҕолор тустууга баҕалаахтара, сытыытык тусталлара көрөргө кэрэхсэбиллээх. Үксүлэригэр – “Боотурдар оонньуулара”, бу республика таһымыгар бастакы холонуулара. Онон да буолуо, бастаан саҕалааччылары өйөөн, кыайыылаахтарга уонна призердарга туһааннаах мэтээллэр, грамоталар, харчынан бириистэр итиэннэ спонсордар көмөлөрүнэн бастыҥнарга өйдөбүнньүк бириистэр туттарылыннылар. Бу күрэхтэһииттэн биһиги бастыҥ бөҕөстөрбүт үүнэн-сайдан тахсыбыттара. Онон быйылгы да түһүлгэттэн талааннаах тустууктар сириэдийэн тахсалларыгар эрэл улахан.

“Боотурдар оонньууларын” түмүгүнэн дьокуускайдар үчүгэй көрдөрүүлэннилэр. Ол курдук, киин куораттар – 12 чемпионнаахтар, 17 иккис, 21 үһүс миэстэлээхтэр. Чурапчылар 7 оҕолоро бастаата, ону тэҥэ 4 иккис, 13 үһүс миэстэлээхтэр. Алта чемпионнаах, 11 призердаах сунтаардар үһүс көрдөрүүлэннилэр. Мэҥэлэр ситиһиилэрэ: 3 бастакы, 4 иккис, 5 үһүс миэстэ. Аммалар 5 чемпионнаахтар, 4 призердаахтар. Нам хамаандата 2 чемпионнаах, 9 призердаах. Оттон уус алданнар – 1 бастакы, 3 иккис уонна 5 үһүс миэстэлээхтэр. Ити курдук Бүлүү 3, Горнай, Ньурба, Өймөкөөн 2-лии, Хаҥалас, Ленскэй, Таатта, Анаабыр, Томпо 1-дии чемпионнаахтар.

“Боотурдар оонньуулара” – биһиэхэ көҥүл тустууну сайыннарыы, инники эрэллэри көрүү, кинилэри тустуунан салгыы дьарыктаналларын көҕүлээһин буолар.

Биллэрин курдук, бу күрэхтэһиини биһиги бастакы президеммит Михаил Ефимович Николаев саҕалаабыта. Онтон ылата үгэс быһыытынан сыллата ыытыллар. Быйылгы күрэхтэһиини Саха Республикатын физическэй культураҕа уонна спорка министиэристибэтэ, республикатааҕы оҕо спордун инники  эрэллэри бэлэмниир киинэ уонна СР спортивнай тустууга федерацията үүннээн-тэьииннээн ыыттылар.

Күрэхтэһии түмүктэниитэ биир дойдулаахпыт, Россия спортивнай тустууга федерациятын отделын начальнига, үтүөлээх тренер Петр Петрович Юмшанов тренердэри кытта көрсөн, үлэни-хамнаһы ырытыста, инники соруктары туруорда.

Петр Павлов.

Ааптар хартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

199063
Бүгүн : 354