Каспийскай-2023: Сэрэбиэй хайдаҕый?

Дьэ, өр күүппүт күрэхтэһиибит бу кэллэ. Бүгүҥҥүттэн Дагестан Каспийскай куоратыгар көҥүл тустууга Россия чемпионата саҕаланар. Бырагыраама быһыытынан бастакы күн үс ыйааһыҥҥа (57, 65, 70 кг) хапсыһыылар буолаллар.

Онуоха биһиги бөҕөстөрбүт балаһыанньалара хайдаҕын ырытан көрүөххэ.

57 киилэҕэ барыта 33 бөҕөс сэрэбиэйи ааспыт. Кинилэртэн Дагестантан – 10, оттон Саха сириттэн – 6. Россия спортивнай тустууга федерациятын уонна хамаанда сүрүн тренерин быһаарыыларынан бары ыйааһыннарга бөлөхтөрү кимнээх баһылыыллара, инники көрдөрүүлэринэн аттарыллан оҥоһулунна. Ол курдук, 57 киилэҕэ Заур Угуев, Рамиз Гамзатов – үөһэ, Ахмед Идрисов уонна Начын Монгуш – аллараа бөлөхтөргө киллэриллибиттэр. Ити саамай сөптөөх быһаарыы. Манна даҕатан эттэххэ, рейтининэн көрөн бастыҥнар сэрэбиэйгэ араарыллыахтаахтарын туһунан уруккуттан суруйар, туруорсар санаам олоххо киирэн эрэриттэн үөрэбин. Ол аата син ааҕаллар, ылыналлар эбит дии саныыбын :)))

Россия чемпионатыгар хапсыһыылар бары тыҥааһыннаахтар, сытыылар. Ол эрэн, боротокуолу көрдөххө, бастакы күн күрэхтэһии саҕаланыыта киһи сэҥээрэр биир сытыы киирсиитинэн Азамат Тускаев уонна Начын Монгуш тустуулара буолуо дии саныыбын.

Бу ыйааһыҥҥа Саха сириттэн Алексей Копылов уонна Федор Постников сэрэбиэй быһыытынан үөһээ, Дьулус Федотов, Любомир Ашеин, Петр Копылов уонна Харысхал Григорьев аллараа бөлөххө киирбиттэр.

Уолаттарбыт бары күрэхтэһиини финал 16/1-тэн саҕалыыллар:

Федор Постников – Кежик Монгуш (Тыва)

Алексей Копылов – Эльдар Казавов (С-Петербург)

Дьулус Федотов – Любомир Ашеин (иккиэн Саха сирэ)

Петр Копылов – И.Шахбанов (Краснодар)

Харысхал Григорьев – Заур Угуев (Дагестан).

Тус санаабар, сэрэбиэйи ырытан баран, Дьулус Федотов уонна Петр Копылов ситиһиигэ дьулуһуохтарын сөп. Кинилэр финал чиэппэригэр тиийэр кыахтаахтар. Дьэ, онно дьолуолара билиэҕэ…

65 киилэҕэ биир киһилээхпит – Дальнай Восток зонатын кыайыылааҕа Дьулусхан Тотонов. Кини бастаан Ш.Гусейновтыын (ХМАО) тустар. Онно кыайдаҕына Д.Амирхановтыын (Москва) киирсиэҕэ. Эрдэ састаапка сурулла сылдьыбыт Александр Иванов тустубат буолбут.

Оттон 70 кг ыйааһыҥҥа үс кыттааччылаахпыт: Олег Фомин, Константин Капрынов уонна састаапка бүтэһик түгэҥҥэ киллэриллибит Владислав Кривошапкин.

Дальнай Восток зонатын уонна «Байкал Опен» турнир кыайыылааҕа Константин Капрынов иккис бөлөххө баһылааччыларга киллэриллибит. Кини бастаан Джабаев диэн Чечня бөҕөһүн кытта киирсэр. Салгыы Кетия – Хатуев пааратын кыайыылааҕар тахсыан сөп. Итиэннэ сылыктааһын быһыытынан финал чиэппэригэр тиийэр кыахтаах. Барыта бэйэтиттэн тутулуктаах.

Бу ыйааһыҥҥа мэтээл иһин сүрүннээн Шираев, Сат, Шериев, Капрынов, Корнеев, Жербаев киирсэллэрэ буолуо дии саныыбын.

Чэ, бастакы күн киирсиилэрин кылгастык ырыттахха итинник. Чемпионат туһунан сонуннары биһиги dzulurgan.ru сайтпытыгар кэтии сылдьыҥ.

Чемпионат хапсыһыылара Дьокуускай бириэмэтинэн 17:00 чаастан саҕаланаллар.

Петр ПАВЛОВ.