«Дьулурҕан» куонкурса: Састаап күүстээх! Дьэ, ким кыайар?

Дьэ, өр күүппүт күрэхтэһиибит саҕаланар күнэ үүннэ. Бүгүҥҥүттэн – Каспийскай куоракка көҥүл тустууга Россия чемпионата.

Күрэхтэһиини көрсө үгэс быһыытынан, «Дьулурҕан» республика спорду сэҥээрээччилэригэр анаан куонкурус биллэрбитэ. Онно 27 киһи кыттыыны ылла. Кинилэргэ барыларыгар барҕа махтал!

Тустуу улахан түһүлгэтигэр бэйэлэрин билгэлээһиннэрин ыыттылар: Василий Алексеев, Евгений Огоюкин, Федора Захарова, Анастасия Алексеева, Айсен Молуков, Вячеслав Константинов, Наталья Посельская, Сергей Лукин, Тимур Константинов, Александр Васильев, Гаврил Скрябин, Герман Шкулев, Андрей Филиппов, Андрей Горохов, Лариса, Надежда, Иван Рожин, Александр Ушницкай, Егор Капитонов, Валерий Ефремов, Гаврил Игнатьев, Иван Корякин, Евгений Дьячковскай, Семен Афанасьев, Константин Стручков, Михаил Максимов, Алексей Бережнев. Испииһэк, ким хаһан, хаһыс киһинэн бэйэтин сылыктааһынын ыыппытынан сурулунна.

Син эмиэ Каспийскай көбүөрүгэр курдук, биһиги куонкуруспутугар састаап күүстээх. Манна Василий Алексеев, Федора Захарова, Айсен Молуков, Вячеслав Константинов, Иван Рожин, Валерий Ефремов, Михаил Максимов курдук «Дьулурҕан» хаһыат араас сылларга ыыппыт куонкурсун кыайыылаахтара бааллар. Дьэ, хайалара кыайар?

Манна биири этиэххэ сөп, И.Корякин – Станислав Свинобоевы призер буолуо диэбит гынан баран, хаһыс миэстэни ыларын ыйбатах, онтон Е.Дьячковскай – Копыловы үһүс оҥорбут эрээри, ханнык Копыловын суруйбатах. Онон кинилэр ити эппиэттэрэ куонкуруска ылыллыбат.

Санатан эттэххэ, хас сөптөөх хоруй ахсын биирдии очукуо ааҕыллар. Син биир урукку курдук, тэҥнэһии түгэнигэр, ким бэйэтин сылыгын урут ыыппыт – ол барыстаах буолуоҕа.

Куонкурус кыайыылааҕа «Первый борцовский» сурунаал редактора Иван Барашков саҥа таһаарбыт «Бриллианты борцовского ковра» диэн бэртээхэй кинигэтин бириис быһыытынан тутуоҕа.

Куонкуруска киирбит билгэлээһиннэри хас биирдии кыттааччы бэйэтэ dzulurgan.ru сайтка киирэн көрө-билэ, ырыта, тэҥнии сылдьыан сөп. Биһиэнэ барыта сиэрдээх!

“Дьулурҕан”.