Сонуннар

Каспийскай-2023: Куонкурус хоруйдарын ырыттахха…

Көҥүл тустууга Россия чемпионатын көрсө олохсуйбут үгэс быһыытынан спорду сэҥээрээччилэргэ анаан куонкурус тэрийбиппит. Онно барыта 27 киһи кыттан, бэйэтин сылыктааһынын ыыппыта. Кинилэр бары да спорду күннэтэ кэтээн көрөр, сыаналыыр, бэйэлэрэ туспа санаалаах, маннык тэрээһиҥҥэ кыттыбыт, өссө хаста да кыайбыт үөрүйэхтээх дьон.  

Бу суруйууга куонкуруска киирбит хоруйдары кылгастык ырытан билиһиннэриэхпит. Бастатан туран, ордук элбэх куолаһы кимнээх ылбыттарын уонна устунан ыйааһыннарынан бастыан сөптөөхтөрү эттэххэ маннык:

Артур Найфонов (86 кг, Хотугу Осетия) – 26 куолас

Абасгаджи Магомедов (61 кг, Дагестан) – 25

Завур Угуев (57 кг, Дагестан) – 23

Заурбек Сидаков (74 кг, Хотугу Осетия) – 23

Ахмед Усманов (79 кг, Дагестан) – 21

Шамиль Мамедов (65 кг, Москва) – 15

Магомед Курбанов (92 кг, Дагестан) – 11

Евгений Жербаев (70, Бурятия) – 11

Алихан Жабраилов (97 кг, Дагестан) – 9

Ален Хубулов (125 кг, Хотугу Осетия) – 8.

Онон, республика тустууну сэҥээрээччилэрин сылыктааһыннарынан (билгэлээһиннэринэн) Россия 2023 сыллааҕы чемпионатын кыайыылаахтарынан сүрүннээн бу ааттаммыт бөҕөстөр буолуохтарын сөп. Манна арай, З.Сидаковка дьон эрэнэн куоластаабыта, киһилэрэ бүтэһик түгэҥҥэ кыттыбат буолан хаалла. Онтон М.Курбановы элбэх киһи уруккунан 92 кг суруйбаттара, киһилэрэ 97 киилэҕэ кыттар. 97 кг Садулаев кыттыбата эрдэ биллибитинэн, куоластааһыҥҥа хайдыһыы таҕыста. Жабраилов 9, М.Курбанов 5 куоластаахтар. Манна даҕатан эттэххэ, бу бөҕөстөр бу кыһын Красноярскайга И.Ярыгин күрэхтэһиитин финалыгар көрсөн тураллар. Онно Курбанов кыайбыта. Бу сырыыга дьэ хайдах буолар?

Куоластааһыҥҥа саамай улахан хайдыһыы сэрэйиллибитин курдук 125 кг буолла. Чемпионнуохтарын сөп диэн барыта 10 киһи аата ахтылынна. Кинилэртэн Хубулов 8, Джиоев, З.Хизриев 4-түү, Шарипов, Хугаев, Хинчагов 2-лии куоластаахтар. Дьэ, кырдьык даҕаны бу ыйааһыҥҥа ким кыайара биллибэт. Арааһа, куонкуруска кыттааччылартан чуо 125 кг кыайыылааҕын таба таайбыт киһи бастыыра буолуо. Көрүөхпүт.

57 киилэҕэ дьон үксэ Угуев буолбут, 61 кг – Магомедов. Онтон 65 киилэҕэ Шамиль Мамедов саҥа сыбаайбалаабытын истэн, сорохтор киниэхэ эрэммэтэхтэр.

Ким интэриэһиргиир, куонкурус хаамыытын бэйэҕит сайтка киирэн, балаһыанньа аннынааҕы Комментарии диэҥҥэ көрүөххүтүн сөп.

Куонкурус иккис ыйытыга, биир дойдулаахтарбытыттан кимнээх миэстэлэһиэхтэрэй диэн этэ. Онно дьон үксэ Константин Капрынов, Алексей уонна Петр Копыловтар, Станислав Свинобоев, Ньургун Сергин, Лев Павлов уо.д.а. диэн суруйбут этилэр. Холобура, 27 кыттааччыттан Капрынов үс бириистээх миэстэ иһигэр киирэригэр – 20 киһи эрэммит. Ити курдук Алексей Копыловка – 12, Станислав Свинобоевка – 16, Петр Копыловка – 10, Ньургун Сергиҥҥэ – 10, Никита Хабаровка – 5…

Онон саха спордун таптааччылара син биир, ханнык да түгэҥҥэ бэйэлэрин уолаттарыгар ыалдьалларын, кинилэргэ эрэнэллэрин, кинилэртэн ситиһиилээх кыттыыны күүтэллэрин көрдөрөллөр.

Куонкурус сылыктааһыннара ханныктык эмэтик билиҥҥи тустуубут таһымын көрдөрөр дии саныыбын. Дьэ, түмүккэ ким кыайыылаах буолан, Иван Барашков тустуу туһунан саҥа кинигэтин илиитигэр тутар?     

«Дьулурҕан».

 

Добавить комментарий

Ваш адрес email не будет опубликован. Обязательные поля помечены *

199555
Бүгүн : 471