«Дыгын оонньуулара-2023»: Ким кыайыай?

Сахалыы многоборье федерациятын президенэ А.М. Скобелев, Дьокуускай куорат физическэй култуураҕа уонна спорка управлениетын начальнига Э.В. Ефимов, Дьокуускай куорат дьаһалтатын баһылыга Е.В. Григорьев көҕүлээһиннэринэн быйылгы “Дыгын оонньуулара” Туймаада ыһыаҕын кэмигэр бэс ыйын 24-25 күннэригэр Үс Хатыҥ сиригэр ыытыллар.

Бэс ыйын 24 күнүгэр күрэхтэһии киэһэ 18:00 чаастан саҕаланар, оттон сарсыныгар ыһыах сүрүн түһүлгэтигэр – күнүс 12:00 чаастан ыытыллар. Бүтэһик быһаарыылаах түһүлгэҕэ сүүмэрдээһини ааспыт 12 боотур күрэс былдьаһар.

Билэргит курдук «Дыгын оонньуулара» сахалыы многоборье сэттэ көрүҥүттэн турар. Ол курдук, бастакы күн, бэс ыйын 24 күнүгэр – «Үс төгүл үс» ыстаныы, «Тутум эргиирэ» уонна мас тардыһыы ыытыллар. Оттон сарсыныгар, бэс ыйын 25 күнүгэр – оҕунан ытыы, 400 миэтэрэҕэ сүүрүү, хапсаҕай уонна таас көтөҕүүтэ буолуохтара.

«Дыгын оонньуута-2023» кыттыылаахтара: Алексей Уваровскай (Кэбээйи), Вячеслав Дьяконов (Нам), Айсен Ботуев (Үөһээ Бүлүү), Дьулустаан Ноговицын (Горнай), Николай Матаннанов (Таатта), Николай Обоев (Ньурба), Айхал Бюлтясов (Үөһээ Бүлүү), Петр Прудецкай (Үөһээ Дьааҥы), Артем Варданян (Нам), Яков Дмитриев (Кэбээйи), Айсен Семенов (Өлөөн), Артем Дьяконов (Кэбээйи).

Сүрүн бириис – 2 мөл. солкуобай. Дьэ, ким кыайыай?

«Дьулурҕан».