«Коркинныы ааҕыылар» кыайыылаахтара

Чурапчытааҕы спортивнай интернат-оскуолаҕа – ССРС, РСФСР, Саха АССР үтүөлээх тренерэ, республика оскуолаларын үтүөлээх учуутала Дмитрий Петрович Коркиҥҥа анаммыт үгэскэ кубулуйбут республикатааҕы научнай-практическай конференция ыытыллан түмүктэннэ. Быйылгы, ХХ конференция Д.П. Коркин төрөөбүтэ 95 сылыгар аналлаах үбүлүөйдээх тэрээһиннэр чэрчилэринэн ыытылыбытынан кэрэхсэбиллээх.

«Коркинныы ааҕыыларга» үөрэнээччилэри, студеннары тэҥэ тренердэр уонна учууталлар эмиэ кытталларынан, атыттартан уратылаах.

Конференция аһыллыытыгар Д.П. Коркин аатынан спортивнай интернат-оскуола дириэктэрин эбээһинэһин толорооччу Станислав Захаров, Ил Түмэн депутата Михаил Гуляев, Чурапчы улууһун баһылыгын бастакы солбуйааччы Мария Кронникова, СР физическэй култуураҕа уонна спорка министрин солбуйааччы Гаврил Мохначевскай, ССРС спордун маастара Семен Морфунов, Чурапчытааҕы физическэй култуура уонна спорт институтун ректора Иннокентий Готовцев, Р.М. Дмитриев аатынан Олимпийскай эрэл училищетын дириэктэрин солбуйааччы Петр Протодьяконов, уо.д.а. кытыннылар.

Научнай-практическай конференция алта секциянан хайдыһан үлэлээтэ. Ааҕыылар түмүктэринэн секцияларга кыайыылаахтарынан буоллулар:

«Д.П. Коркин уонна тустуу: бэҕэһээ, бүгүн, сарсын» секцияҕа – 11-с кылаас үөрэнээччитэ Ира Прядезникова.

«Үүнэр көлүөнэҕэ физическэй культуранан уонна спордунан дьарыктаныы оруола» секцияҕа – Чурапчытааҕы институт бастакы курсун студена Андрей Васильев.

«Оҕо спордуттан – Олимпиадаҕа» секцияҕа – ОЭУ бастакы курсун студена Алеся Трифонова.

«Доруобай оҕо – омук кэскилэ» секцияҕа – 7-с кылаас үөрэнээччитэ Сеня Никитин.

«Спортсменнары өй-санаа өртүнэн иитии» секцияҕа – английскай тыл уруогун учуутала З.А. Шестакова.

«Физическэй култуураҕа уонна спорка үөрэтии уратылара» секцияҕа – үөрэх чааһын методиһа М.В. Рожина.

Маны тэҥэ «Коркинныы ааҕыылар» тэрээһин чэрчитинэн олимпийскай хамсааһыҥҥа сыһыаннаах интеллектуальнай оонньуу ыытылынна. Барыта 20-чэ үөрэнээччи уонна студент кытынна. Түмүккэ Д.П. Коркин аатынан республикатааҕы спортивнай интернат-оскуола хамаандата бастаата. Иккис миэстэни Р.М. Дмитриев аатынан Олимпийскай эрэл училищетын хамаандата ылла.

Дьэ, ити курдук, улуу тренер Дмитрий Петрович Коркин төрөөбүтэ 95 сылыгар аналлаах республикатааҕы тэрээһиннэр көхтөөхтүк саҕаланнылар. Сүрүн түһүмэхтэр, күрэхтэһиилэр күһүн ыытыллаллара күүтүллэр.

«Дьулурҕан».

  

 

Добавить комментарий

Ваш адрес email не будет опубликован. Обязательные поля помечены *

051035
Бүгүн : 212