Сонуннар

Роман Дмитриев үтүө аата салгыы үйэтитиллэр

Дьокуускай. “Өрөгөй” Спорка бэлэмнэнии киинигэр олимпийскай чемпион Роман Дмитриев сырдык аатыгар көҥүл тустууга эдэрдэргэ норуоттар икки ардыларынааҕы турнир үгэннээн ыытылла турар.

Күрэхтэһиини үөрүүлээхтик аһыыга Саха Республикатын Правительствотын председателин солбуйааччы Сергей Местников, Россия спорка министиэристибэтиттэн Александр Кызласов, Р.М. Дмитриев кэргэнэ Антонина Дмитриева, Россия кыргыттарга сүүмэрдэммит хамаандатын тренерэ, олимпийскай призёр Алёна Карташова, күрэхтэһии кылаабынай судьуйата Анатолий Ковалёв кыттыыны ыллылар.

Хаһан баҕарар буоларыныы, бэлиэ түгэн хамаандалар парадтаан киириилэринэн саҕаланна. Быйылгы түһүлгэҕэ – 13 дойдуттан уонна Россия 15 регионуттан барыта 200-тан тахса спортсмен кыттар. Кинилэр ортолоругар бэйэлэрин саастыылаахтарыгар Россия, Азия, Европа, аан дойду күрэхтэһиилэрин кыайыылаахтара уонна призёрдара бааллар. Ордук, улуу пехлеваннаахтарынан биллэр Иран хамаандата үчүгэйдик бэлэмнэнэн кэлбит.

Тыл этээччилэр сүрүннээн Роман Михайлович Дмитриев үтүө аатын үйэтитии үлэлэрэ ыытыллалларын, эһиил, төрөөбүтэ 75 сылыгар Эдьигээҥҥэ спортивнай комплекс тутулларын, кини олоҕун көрдөрөр уус уран киинэ оҥоһуллан бүтэрин уонна үбүлүөйдээх күрэхтэһии тэриллэрин туһунан эттилэр.

Александр Кызласов бэйэтин эҕэрдэтин кэнниттэн Россия спорка министиэристибэтин наҕараадатын – бэлиэ суруктарын Саха Республикатын физическэй культураҕа уонна спорка миниистирэ Леонид Спиридоновка уонна Р.М. Дмитриев аатынан Олимпийскай эрэл училищетын дириэктэрин бастакы солбуйааччы Александр Контоевка туттарда.

Оттон Россия көҥүл тустууга эдэрдэргэ сүүмэрдэммит хамаандатын тренердэрэ Абдусалам Гадисов уонна Шамиль Кудиямагомедов Дагестан Республикатын спортивнай тустууга федерациятын өйдөбүнньүк бэлэҕин – Россия тустууга федерациятын эппиэттээх үлэһитэ, биир дойдулаахпыт Петр Юмшановка туттардылар.

Күрэхтэһиини үөрүүлээхтик аһыы ырыанан уонна үҥкүүнэн доҕуһуолланна. Дьэ, ол кэнниттэн быһаарыылаах хапсыһыылар саҕаланнылар…

Петр Павлов.

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *

141124
Бүгүн : 232