Сонуннар

Ньурбаҕа уолаттар боксаҕа күрэхтэһиилэрэ саҕаланна

Олунньу 22 күнүттэн Ньурба улууһун Октябрьскай сэлиэнньэтигэр А.И. Пахомов аатынан успуорт саалаҕа 2009-2010 cыллаах төрүөх уолаттарга боксаҕа ССРС норуоттар икки ардыларынааҕы кылаастаах успуордун маастара В.Н. Ефремов аатыгар күрэхтэһии саҕаланна.

Бу күн спортсменнар уонна тэрийээччилэр Арассыыйа уонна СӨ үтүөлээх тренерэ, Арассыыйа уонна СӨ физическэй култууратын үтүөлээх үлэһитэ, Д.П. Коркин аатынан суударыстыбаннай бириэмийэ лауреата, Саха сиригэр уонна Арассыыйаҕа бокса сайдыытыгар сүҥкэн кылааттаах, боксаҕа ССРС успуордун маастара А.И. Пахомов мэҥэ тааһыгар сибэкки дьөрбөтүн уурдулар. Улуус баһылыгын солбуйааччы Н.И. Бурнашев, Октябрьскай нэһилиэгин баһылыга С.А. Корякин, А.И.Пахомов быраата В.Н. Пахомов, республиканскай бокса оскуолатын дириэктэрэ М.А.  Куприянов тыл эттилэр.

Боксаҕа ССРС норуоттар икки ардыларынааҕы кылаастаах маастара, Ньурба оройуонун  Бочуоттаах олохтооҕо – Виктор  Николаевич Ефремов аатыгар оҕолорго боксаҕа өрөспүүбүлүкэтээҕи күрэхтэһиигэ 131 эдэр боксер, 16-та улуустан  муһуннулар.

Виктор Ефремов аан маҥнай боксанан Ньурба кэтит киэлитигэр Саха АССР үтүөлээх тренерэ Герасим Быдыгыев салалтатынан  дьарыктаммыта. Уһулуччу дьоҕурдаах спортсмен икки төгүл ССРС призера, Малига, Алжирга, Махачкалаҕа ыытыллыбыт норуоттар икки ардыларынааҕы таһымнаах күрэхтэһиилэргэ кыайыылаах үрдүк аатын ситиспитэ. Кэлинҥи сылларга СӨ Бокса федерациятын президиумун чилиэнинэн үлэлээбитэ. Виктор Николаевич олоҕун тиһэх күннэригэр диэри успуорт сайдыытыгар бэриниилээхтик үлэлээбитин туоһута буолар, кини сырдык аатыгар ыытыллар бүгүҥҥү күрэхтэһии.

Боксанан дьарыктанар спортсменнарга, тренердэргэ, салайар үлэһиттэргэ бука барыгытыгар Виктор Николаевич аата мэлдьи холобур, суолдьут сулус буоллун. Ким бэлэмнээх, ким дьулурдаах – ол кыайдын!

Сайыына Саввинова суруйуута.

Ольга Сергеева хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

106423
Бүгүн : 186