Бүтүн Россияҕа үһүс буоллубут!

Быйыл кыһын тохсунньу ыйбыт хаһааҥҥытааҕар да тоһуттар тымныытынан соһутта. Ыйы быһа -55, -60 кыраадыстан түспэтэ. Дьэ, маннык тымныы күннэргэ иккис сылын толору хаамыынан дьарыктаммыт Уус Алдан улууһун 2-с Лөгөй нэһилиэгин олохтоохторо тохтообокко, кыратык мөлтөөн да ылбакка хаамтылар.

Ол курдук, инники «Дьулурҕан» хаһыакка (09.12.2021) суруйбутум курдук, «Лига здоровья наций» уопсастыбаннай тэрилтэ уонна РФ Спорка министиэристибэтэ «Человек идущий» диэн сибиэһэй салгыҥҥа хаамыыга хамаанданан күрэхтэһиини тиһигин быспакка тэрийэр. Күрэхтэһии аныгы олох тэтиминэн мобильнай сибээс нөҥүө уһун кэмҥэ хардыыны ааҕар.

Биһиги нэһилиэк үһүс күрэххэ аан бастаан кыттан Россия араас муннугуттан кыттыбыт 275 хамаандаттан 34-с миэстэҕэ тиксэн үөрбүппүт. Итинтэн ыла күрэх аайы инники миэстэҕэ сыҕарыйан, ааспыт күһүн 343 хамаандаттан бэрт кыһыылаахтык алтыс миэстэ буолбуппут.

Ити кэнниттэн ахсынньы ыйга «Саҥа дьыллааҕы марафон» диэн биирдиилээн хаамыыга 4100 киһи хаампыта. Биһигиттэн Надежда, Василий Окоемовтар уоллара Арчынныын хаампыттара олус кэрэхсэбиллээх.

Дьэ бу хабараан тымныыга хаамыы «Хас биирдии муниципалитекка – доруобуйа маршрутун» диэн тохсунньу 16 күнүттэн 30 күнүгэр диэри салҕанан ыытылынна. Манна хамаанданан икки араас күрэх буолла. Биһиги нэһилиэк дьоно иккис көрүҥҥэ 21 буолан хаамтылар. Үксүн үстүү-түөртүү буолан түмсэн айылҕаҕа, хойуу туманы быыһынан 25000 хардыыны толору оҥороору көхтөөхтүк кытыннылар. Күрэх бүппүтүн кэнниттэн түмүгү долгуйа күүттүбүт. Дьэ, бүтэһиктээх күрэх түмүгүнэн 518 хамаандаттан үһүс бочуоттаах миэстэҕэ тахсан – үөрүүбүт үрдээтэ. Бастакы миэстэни Адыгея Республикатын “Майкоп” хамаандата ылла. Иккиһи – Ивановскай уобалас “Пучежные нордики” хамаандата ылла.

Тулунабыт хамаандатыгар оскуола учуутала Лидия Степановна Сергеева оҕолорун Ганяны, Галяны кытта хааман – биир дойдулаахтарын сөхтөрдө.

Биһиги хамаандабыт, түмсүүбүт хапытаана Раиса Николаевна Троева (71 саастаах) олус чуолкайдык хас биирдии чилиэнин ыкса сибээстэһэн, барыларын күрэххэ көҕүлээн, итинник инники миэстэҕэ тигистилэр. Түгэнинэн туһанан, Раиса Николаевна сыл түмүгэр «уһун үйэлэнии инструктора» диэн Саха Республикатын «Спорт – норма жизни» хамсааһыҥҥа иккис миэстэни ылбытынан эҕэрдэлиибит!

Хомойуох иһин, бу киэҥ хабааннаах, бэртээхэй хамсааһыҥҥа Саха сириттэн бэрт аҕыйах хамаанда кыттар. Ньурба куорат саҥа саҕалаабыта кэрэхсэбиллээх. Хаамар дьон Россия үрдүнэн, республиканан, улууска элбээн иһэллэрин бары истэ-билэ, ааҕа сылдьабыт. Онон хаамыы доруобуйаҕа, уһун үйэлэниигэ саамай сөптөөх хамсааһын дии саныыбыт.

Мариса ВАСИЛЬЕВА-Күбэйэ. Россия Суруналыыстарын сойууһун чилиэнэ.

Уус Алдан, Тулуна.