Бириистээх миэстэлэргэ – үөрэнээччилэр

Покровскайга, ССРС спордун маастара Игорь Андреевич Никифоров кэриэһигэр 100 харахтаах дуобакка Саха сирин чемпионата ыытыллан түмүктэннэ. Түөрт күннээх чемпионакка, республика бастыҥнара бары кытыннылар.

Түмүккэ дьахталларга 1 миэстэ – спорт маастара Сандаара Апросимова, 2 миэстэ – международнай гроссмейстер Наталия Шестакова, 3 миэстэ – спорт маастара Тунаара Федорова буоллулар.

Оттон эр дьоҥҥо маастар Кычкин Василий бастаата, маастарга кандидат Егоров Айсен иккис буолла, международнай гроссмейстер Колесов Гаврил үһүстээтэ.

Саха Республикатын дуобакка хамаандатын сүрүн тренерэ, гроссмейстер Гаврил Колесов:

–Дуобаппыт эдэримсийэн эрэр, ол үөрдэр. Ол курдук, оскуола үөрэнээччилэрэ Апросимова Сандаара, Фёдорова Тунаара, Егоров Айсен бириистээх миэстэлэргэ таҕыстылар. Бүтэhик туурга диэри ким кыайара биллибэт этэ, конкуренция күүстээх. Дьахталларга Матрёна Ноговицына оонньуута табыллыбата. Хаҥаластарга махтал, күрэхтэhиини үрдүк таhымҥа тэрийдилэр.

«Дьулурҕан».