«Кыайыыны ситистэ, Роман Дмитриев! Сэбиэскэй Сойуус!»

Бу сэдэх хаартысканы миэхэ Сергей Лукин бэлэхтээтэ. Сергей Иннокентьевич – тустуу биир бэриниилээх сүгүрүйээччитэ. Кини – архитектор, Россия архитектордарын сойууһун чилиэнэ, элбэх архитектурнай оҥоһуктар ааптардара. Холобур, “Туймаада” стадион таһынааҕы олимпийскай чемпион Роман Дмитриев уонна Олимпийскай эрэл училищетын таһынааҕы улуу тренер Дмитрий Коркин пааматынньыктара – кини үлэлэрэ.

Билэргит курдук, соторутааҕыта “Строительнай” Атыы-эргиэн киинин Быыстапкалыыр саалатыгар үтүөлээх тренер Д.П. Коркин төрөөбүтэ 90 сылыгар аналлаах Быыстапка тэриллибитэ. Онно мин бэйэм коллекциябынан кыттыбытым. Холобур, албан аатырбыт тустууктар уонна тренердэр урукку сэдэх хаартыскаларын анаан раамалаан көрдөрүүгэ туруорбутум. Ону көрөн, С.И. Лукин миэхэ биир ураты хаартысканы бэлэхтиэх буолбута. Эрэннэрбитин курдук, аҕыйах хонуктааҕыта көрсөн, бу хаартысканы анал раамалаан, бэлэх уунна.

Маннык хаартысканы мин урут көрө илигим. Сергей Иннокентьевич бу түһэриини интернет ситимиттэн булбут, ол эрээри, билигин ону сатаан булбаккын.

Хаартыскаҕа, Роман Дмитриев болгарин Хасан Исаевы кыайан турара көстөр. Бу – 1976 сыллааҕы Монреаллааҕы (Канада) сайыҥҥы Олимпиада көҥүл тустууга күрэхтэһиитэ, 48 кг ыйааһыҥҥа төрдүс эргииргэ Роман Дмитриев – Хасан Исаевы 9:6 ахсаанынан кыайбыта.

Санатан эттэххэ, бу, аан дойду аар-сааргы атырбыт тустууктарын иккис көрсүһүүлэрэ. Оттон көбүөргэ маҥнайгы киирсиилэрэ 1973 сыллаахха Иран киин куоратыгар Тегераҥҥа тэриллибит аан дойду чемпионатыгар буолбута. Онно “Фарах” стадиоҥҥа ыытыллыбыт, чемпион аатын быһаарар 9 мүнүүтэлээх хатыһыылаах хапсыһыыга, сэбиэскэй спортсмен 1:0 ахсаанынан кыайыыны ситиһэн, аан дойду чемпионатын кыһыл көмүс мэтээлинэн наҕараадаламмыта.

Кэлин, Роман Михайлович биир интервьютугар ити хапсыһыыны – биир саамай быһаарыылаах тустуутунан сыаналаабыта.

Ити курдук, Роман Дмитриев – Европа, аан дойду, Олимпиада чемпиона болгарин Хасан Исаевы кытта көбүөргэ иккитэ көрсөн – иккиэннэригэр кыайыы кынаттаммыта.

Сергей Иннокентьевич Лукиҥҥа, бу сэдэх бэлэҕин иһин Махтал!

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *