Олоҥхо ыһыаҕын спорка күрэхтэһиитэ хайдах буолуой?

Биллэрин курдук, бэс ыйын 20-21 күннэригэр Намҥа XIII өрөспүүбүлүкэтээҕи Олоҥхо ыһыаҕа ыытыллыаҕа. Онон сибээстээн, Нам улууһун физическэй култуураҕа уонна спорка управлениетын начаалынньыга Павел Иванову көрсөн, быйылгы ыһыах спорка бырагырааматын туһунан сурастым.

-Павел Гаврильевич, дьэ, Олоҥхо ыһыаҕын спорка чааһыгар ханнык көрүҥнэр киирдилэр, хайдах буолуохтарай? Сэрэйдэххэ, онно эн тэрийээччи быһыытынан үлэлэһэ сылдьар буолуохтааххын.

-Олоҥхо ыһыаҕа биһиэхэ аан бастаан буолар. Ылан көрдөххө, намнар улахан тэрээһиннэри кыайа-хото тутан ыытар үтүө үгэстээхтэр. Холобурдаан эттэххэ, 2014 сыллаахха Саха сирин норуоттарын VI спортивнай оонньуулара үрдүк тэрээһиннээхтик ыытыллан түмүктэммиттэрэ. Ити курдук, тэрээһиннэри үрдүк таһымҥа таһааран, Олоҥхо ыһыаҕын биһиэхэ биэрдэхтэрэ дии саныыбын. Олоҥхо ыһыаҕа – улахан тэрээһин. Улахан суолталаах. Билигин миэстэҕэ үгүс үлэ бара турар. Ыһыахтыыр сирбит, түһүлгэбит кэҥээтэ, киэркэйдэ. Трибуналаах түһүлгэни сүрдээх үчүгэйдик оҥоро сылдьаллар. Тулалаан турар айылҕата да силигилээн ситэн турар.

Улууспут салалтата, баһылык Юрий Слепцов үлэлэһэ аххан сылдьар. Биһиэхэ, спорт үлэһиттэригэр болҕомто ууран эрэллэр. Ыһыах сиэринэн сахалыы көрүҥнэргэ күрэхтэһиилэр тэриллиэхтэрэ. Ол курдук, мас тардыһыыга уонна хапсаҕайга күрэхтэһиилэр ыытыллыахтара. Өссө сахалыы ыстаныылар баар буолуохтара. Итиэннэ оҕунан ытыыны киллэрдибит. Биирэ “Далла мэндэйии”, иккиһэ “Байанай күрэҕэ” диэн.Ол аата, билигин ааттыылларынан, традиционнай оҕунан ытыахтара. Маныаха биһиэхэ оҕунан ытыы спордун өрөспүүбүлүкэтээҕи федерацията күүс-көмө, өйөбүл буолуохтаах. Күрэхтэһиилэр балаһыанньалара тарҕатыллан тураллар, онон кыттааччылар билэллэр диэххэ сөп. “Далла мэндэйиигэ” уустар ох оҥороллор уонна тута ким ырааҕы ытарыгар, сыалы табарыгар күрэхтэһиэхтээхтэр. Маны таһынан, хабылык-хаамыска күрэхтэһиитэ баар.

Биир интэриэһинэй күрэхтэһиинэн “Эр бэрдэ” көрүҥ буолуоҕа. Манна айылҕаттан күүстээх-уохтаах дьон кыттыахтара. Онно оптуобуһу соһуу, сымара таастары көтөҕүү, дьаарыстаан ууруу… наар күүһү-уоҕу тургутар түһүмэхтэргэ күүстэрин холонуохтара. Итиэннэ оҕолорго “Үрүҥ уолан” диэн сахалыы многоборьеҕа күрэхтэһии былааннанар. Эмиэ сүрдээх интэриэһинэй буолуоҕа. Бу көрүҥнэргэ күрэхтэһиилэр стадиоҥҥа киэһэ өттүгэр ыытыллыахтара.

Нам улууһа гиирэ спордугар уруккуттан дириҥ историялааҕын быһыытынан, гиирэҕэ күрэхтэһиини киллэрэн биэрдибит. Бу күрэхтэһии эстафета быһыытынан барыаҕа. Биирдии спортсмен гиирэни иккилии мүнүүтэ көтөҕүөхтээх. Хамаандаҕа уонча киһи киириэхтээх. Оҕолор, дьахталлар, эр дьон, бэтэрээннэр…

Ону тэҥэ ыһыах буоларын быһыытынан, ат сүүрүүтэ киирэн турар. Онон уопсайа, уонча көрүҥҥэ күрэхтэһиилэри тэрийэн ыытыахтаахпыт. Кыттааччылара элбэх буолара күүтүллэр. Бириис өттүгэр билигин үлэ бара турар. Уопсайынан, улахан сыаналаах бириистэр оонньоноллоругар дьулуһабыт. Бэс ыйын 19 күнүгэр кыттааччылартан сайаапкалары хомуйабыт уонна сарсыҥҥытыттан күрэхтэһиилэр саҕаланан киирэн бараллар. Оттон 21-кэ хапсаҕай уонна “Үрүҥ уолан” күрэхтэһиилэр ыытыллыахтара. Гиирэ спордуттан уонна “Эр бэрдиттэн” ураты күрэхтэһиилэр барыта ыһыахтыыр сиргэ ыытыллыахтара. Судьуйалааһыҥҥа сүрүннээн Манчаары аатынан спорт төрүт көрүҥнэрин өрөспүүбүлүкэтээҕи кииниттэн исписэлиистэр кэлиэхтээхтэр.

Биир ураты тэрээһининэн, Аммаҕа ыытыллар Саха сирин норуоттарын VII спортивнай оонньууларын уотун эстафетатын туттарыы буолуоҕа.

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *