Охлопковтаах Бекренев биир бөлөххө түбэспиттэр

Румынияҕа ыытылла турар көҥүл тустууга Дьобуруопа чөмпүйэнээтигэр иккис ыйааһыҥҥа (61 кг) саха тустууга кыһатын икки иитиллээччитэ кыттар. Бу ыйааһыҥҥа сэрэбиэй буолла. Ол быһыытынан, манна 14 бөҕөс суруйтарбыт. Аны кинилэр сарсыарда ыйааһыннаныыны барыахтара.

Састаабы ырытан көрдөххө, күүстээхтэртэн аан дойду, Дьобуруопа чөмпүйэнээттэрин призера грузин Бека Ломтадзе, Арассыыйа чөмпүйүөнэ, Ярыгин турнирын кыайыылааҕа Магомедрасул Идрисов, Дьобуруопа былырыыҥҥы чөмпүйэнээтин боруонса призера турок Реджеп Топал бааллар. Биһиги да бөҕөстөрбүт: бэйэтин иккис дойдутугар – Румыния көбүөрүгэр тустар Николай Охлопков уонна Белоруссия чиэһин көмүскүүр Андрей Бекренев даҕаны киирсэн баран тэйэр тустууктар.

Кинилэртэн сэрэбиэй быһыытынан Ломтадзе эрэ үөһээ бөлөххө түбэспит, онтон атыттар бары иккис бөлөххө киирбиттэр. Сэрэйдэххэ, грузин финалга холкутук тахсыыһы. Ол эбэтэр, киниэхэ Македония, Албания, Швейцария, Молдова уонна Израиль кимиэхэ даҕаны улаханнык биллибэт бөҕөстөрө түбэспиттэр. Үчүгэйэ диэн, кинилэртэн биирдэстэрэ – Дьобуруопа чөмпүйэнээтин боруонса мэтээлин кэтиэҕэ.

Оттон ол кэмҥэ аллараа бөлөххө тэҥ баайыылаах тустууктар тыҥааһыннаах, сытыы хапсыһыылара күүтүллэр. Кинилэртэн мэтээлгэ икки эрэ киһи тиксэр. Балаһыанньа оннук. Тоҕо мин итини чорботон бэлиэтиибиний? Тоҕо диэтэргит, күүстээхтэри тэҥҥэ аттаран туруоруу рейтинг быһыытынан буолуохтаах этэ. Ол систиэмэ тутуһуллубата. Ол курдук, Николай Охлопков азербайджанец Аскер Мамадалиевтыын, оттон Андрей Бекренев болгар Наим Микяйдыын тустар буолбуттар. Туох да диэн, биһиги бэйэбит бөҕөстөрбүтүгэр ыалдьыбыппыт үрдүнэн, Азербайджан уонна Болгария тустуулаах дойдулар. Онон кинилэри сэниир табыллыбат. Эмиэ кыайардыы оҥостон кэлбиттэрэ өйдөнөр. Бу бөлөххө Идрисов уонна Топал хара бастакыттан көрсөр буолбуттар. Өссө иккис бөлөххө армянин Арутюнян, украинец Буруков курдук киһи сирбэт бөҕөстөрө бааллар.

Уолаттарбыт бастакы эргиири этэҥҥэ аастахтарына, иккискэ – бэйэ-бэйэлэрин кытта көрсүөхтэрин сөп. Салгыы балаһыанньа хайдах буоларын биһиги dzulurgan.ru сайтпытыттан билэн иһиэххит.

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *