”Ылыналлара буоллар, тупсуо этибит. Өйүүллэрэ буоллар, өрүһүнүө этибит”

Соторутааҕыта “Саха сирэ” хаһыат спорка аналлаах “Дьулурҕан” сыһыарыытыгар “Уруккунан олорумуохха, уларытыыны киллэриэххэ” диэн, Саха сирин тустууга календарыгар күрэхтэһиилэри бэрээдэктиир туһунан тус санаам бэчээттэммитэ. Ити, спорпут, чуолаан көҥүл тустуубут кэлимник сайдыытын систиэмэтэ ситэтэ суох диэн санааттан суруллубута.

Ыстатыйа хаһыакка бэчээттэммитин таһынан, социальнай сеттэргэ уонна батсаапка тустуу бөлөхтөрүгэр тахсан – киэҥ сэҥээриини ылбыта. Мантан салгыы тустууну таптааччылар бу санаа тула бэйэлэрин сэҥээриилэрин суруйбуттарын түмэн, хайдах баарынан, тылларын-өстөрүн, суруйар стиллэрин уларыппакка эһиэхэ билиһиннэрэбин.

Ону бэйэҕит ааҕыҥ уонна сыаналаан, сахабыт тустуута сайдарын туһугар. Били, Виктор Цой ырыатыгар курдук, биһиги уларыйыыны, сайдыыны, инникигэ хардыыны кэтэһэбит!

Пудов: “Олох саамай сөпкө суруйбуккун уонна урукку курдук зоналарынан ыытан баран, түөрт иһигэр киирбит зоналартан республикаҕа туһуннарыахха наада уонна аҕыс бастыҥ хамаандалар кубогы былдьаһыылара хайаан да наада”.

Скрябин: “Тойон тустукистар глухойдар, слепойдар”.

Василий Стрекаловскай: “Бүөтүр Павлов бэркэ суруйбуккун. Мин сөпсөһөбүн. Оччоҕо Саха сиригэр икки улахан турнир баар буолар уонна күүстээх тустууктарбыт күһүн отборданан улахан күрэххэ киирэллэр”.

Семен Рожин: “Тарскай чемпионатын Коркин турнирын иннинэ оҥоруохха наада. Уонна Тарскай кубога диэбэккэ, атын кубогы оҥоруохха наада. Холобура, Дрим-тим хамаандалар. Наар биир хамаандалар киирсибэттэрин курдук. Календары төрдүттэн уларытыахха наада. Самородоктары аһар инниттэн. Ыытыллар күрэхтэһиилэр наар биир күдьүс. Күрэхтэһии элбэх да, көдьүүс суох. Маасса син биир наада. Бастаан улуустар күрэхтэһиилэрэ буолуохтаах. Путевкалаах. Биһиги суолбут-ииспит атахтыыр. Эбэтэр, Тарскай кубога диэн түөрт сылга биирдэ ыытыллар гына оҥоруохха сөп, футболга курдук, таһымын үрдэтэн. Холобур, хоккейга “Канада Кубогын” курдук”.

“Хамаанданан кубок күрэхтэһиитэ баар буолуохтаах!”

Контоев: “Республика чемпионата саамай ордук бириэмэтин үчүгэйдик Россия, ЮВВ календарнай былаанын көрөн ырытан баран табыгастаах, бары лидердарбыт баар кэмнэригэр ыытыахха наада дии саныыбын. Кылаабынайа, бириэмэтин үчүгэйдик туруоруохха наада. Ону тэҥэ хамаанданан кубок күрэхтэһиитэ баар буолуохтаах”.

Иван Степанов: “Бокса эмиэ уларыйыахтаах этэ. Биир киһини көрөн баран сылдьаллар, эдэрдэр эҥин ханналарый? Уларыйыы киириэхтээх”.

Корякин: “Кубок – көрөөччүгэ интэриэһинэй. Биһиэхэ итинник ыытыллара тойоттортон тутулуктаах. Харчыны кинилэр быһаараллар. Спортсмен дьылҕатын. Ону улахаҥҥа уурбаттар. Талбыттарынан айбардыыллар. Бары саханы ааттатабыт дииллэр даҕаны… Туруорсан да, тугу даҕаны ситиспэккин. Сахалар бэйэлэрин икки ардыгар эрэ хорсуттар. Оттон кавказтары ылан көр, Фадзаевтаах, Сайтиевтаах, Хадарцевтаах бэйэлэрин харчыларыгар тустуу дыбарыастарын туттардылар дии. Кубок син биир харчыга тэриллэр буоллаҕа дии. Үчүгэй бириистээх буолуохтаах. Ол грамота диэхтээн…”

Василий Жирков: “Сөптөөх суруйуу. Саха сирин тустууга чемпионата календарьнай былаан быһыытынан сыл саҕаланыан иннинэ, күһүн сэтинньигэ биирдиилээн чемпионат курдук оҥорорго уонна кэлэр сылга республика сүүмэрдэммит хамаандатын онтон тэрийэн таһаарыахха диэн суруйуун сөп. Мин саныахпар, сөптөөх боппуруоһу туруораҕын. Итини долоҕойдоругар түһэрэн, итинэн дьарыктанар биир эмэ салалта баара дуу, суоҕа дуу? Сөптөөх боппуруос турар. Кырдьык, билигин чемпионат аат эрэ харата ыытыллар. Көрөөччү интэриэһэ сүттэ. Этэргэ дылы, тустан бүппүт, эбэтэр саҥа туста сатыыр дьон кытталлар. Онон инники күрэхтэһиилэргэ сүүмэрдэнэр курдук улахан ситиһиилээх тустууктар бары кытталлара эбитэ буоллар, үчүгэй бөҕө буоллаҕа дии. Саамай сөпкө суруйбуккун”.

“Тустуу федерациятыгар сурук түһэрдэххэ, быһаарыахтарын сөп этэ”   

Егор Степанович: “Бу олох саамай сөпкө эппит, Петр Семенович. Итини тустуу федерациятыгар сурук түһэрдэххэ быһаарыахтарын сөп этэ”.

~ololwolow2: “Тарскайы күһүн балаҕан ыйыгар ыыталлара буоллар, Коркин иннинэ, онтон сборнайга киирбит уолаттар биир сыл күрэхтэһиилэргэ соһорго үбүлүүргэ бэрт буолуо этэ, саас күрэхтэһии элбэх дии”.

Леонид Спиридонов: “Петр Семенович сөпкө этэҕин. Республика чемпионата улуустар эрэ икки ардыларыгар күрэхтэһии курдук буолбута ыраатта. Тарскайы сыл саҕаланыыта, эбэтэр сыл түмүгэр ыытыахха наада. Ол түмүгүнэн Миндо и ДВФО. Сборнайы талыахтаахпыт”.

Станислав: “Петр Семёнович олох сөпкө этэр, бу этиини федерация өйүөн наада. Сылын ахсын атын ааттар баар буолуохтара. Тренердэр да атыннык үлэлээн, сүүмэрдэммит хамаандаҕа киллэрэр туһуттан тыаҕа да үлэ барыа этэ”.

Н.Р. Крылов: “Бу сөпкө суруйбуккун”.

“Тарскай чөмпүйэнээтигэр саамай бастыҥнарбыт кытталлара ситиһиллиэхтээх”

Сылык: “Петр Павлов сөптөөх этиини оҥордо. Маны тустуу федерацията өйүүрэ хайаан да наада. Урут улуустар чемпионаттара үрдүк таһымнаахтык ыытыллар этилэр. Ол бэйэлэрэ симэлийдилэр. Арай уус алланнар эрэ итини өрө көтөҕө сатыыллар. Аны, онтон сылтаан, республикабытыгар тустуу Н.Н. Тарскайбыт бирииһигэр ыытыллар чөмпүйэнээппит кэхтэригэр тиийдэ. Ити Сахабыт сиригэр көҥүл тустуубут кэхтиитигэр тиэрдэригэр өйдөнөр дии саныыбын. Ону, “Өрөгөйбүт” дыбарыаһыгар бу, саамай улахан суолталаах күрэхтэһиибитигэр ыалдьааччыларбыт суохтара да көрдөрөр. Онон Петр Павлов саамай сөптөөх боппуруоһу туруорда. Н.Н. Тарскай бирииһигэр чөмпүйэнээккэ сахабыт норуота саамай бастыҥ тустууктара кытталларын ситиһиллиэхтээх. Оччоҕо эрэ тустуубут сайдыа, тустууктарбытыгар үрдүккэ тардыһыыларыгар стимул үөскүө”.

Павел Васильев: “Сөпкө этэҕин. Ити тустуу эрэ проблемата буолбатах. Бокса чемпионата суолтатыгар эрэ ыытыллар буолбута ыраатта. Чэпчэки атлетика чемпионатыгар иккис, үһүс разряд нуорматынан бастыыллар. Бастыҥнар сборга сылдьар аатыран кыттыбаттар”.

Дьулустаан Сергеев: “Барытын UWW-га тиийэ сааһылааһын барыа этэ. Бастаан оройуон – республика – федеральнай округ – дойду – Европа – аан дойду системанан барыа этэ. Биһиэнэ барыта ыһыллаҕас, бастаан ДФО буолар, онтон дьэ республика. Отбор игин диэн көрүллүөхтээх этэ дии”.

Виталий Сур: “Саамай сөп. Улуустар, зоналар таһымнарынан күрэхтэһиилэр суохтар. Тарскай субу буолан эрдэҕинэ төлөпүөнүнэн ыҥырсан хамаанда тэрийэн кытталлар. Кырдьык, республика чемпионата туох да систиэмэтэ суох быһыылаах”.

“Телевизорынан прямой эфиры тохтотуохха”

Николай Григорьев: “Тустуу саха дьонугар улахан суолталаах. Н.Тарскай турнира күһүн буоларын сөпсүһэбин. Прямой эфиры тохтотуохха баара. Дьон кэлэн билиэккэ харчы төлөөн, илэ харахтарынан көрөллөрө наада дии саныыбын”.

Андрей: “Дьэ бу сөптөөх этииб уолла. Саҥа салалта уларытыы киллэрэр ини диэн эрэнэбит уонна ити оҕо спордуттан эдэрдэргэ, улахан дьоҥҥо көһөллөрүн, тренер уларыйыытын бэрээдэктиир киһи бэт былдьаспакка, оччоҕуна дьэ олимпийскай мэтээл кэлиэ этэ арааһа”.

Гаврил Черкашин: “Суруйуу сөптөөх. Республиканы кыайбыт эрэ буоллаххына сборнайга киириэхтээххин”.

Петр Варламов: “Петр, бу бэркэ суруйбуккун, этии киллэрэн. Ылыналлара буоллар, тупсуо этибит. Өйүүллэрэ буоллар, өрүһүнүө этибит”.

Оппуонньа: “Петр Семенович сөптөөх боппуруоһу туруорар. Саҥа салалта системаны уларытан дьиҥ сахабыт тустуутун туһугар кырдьыктаахтык улэлиирэ наада. Күүс хаһан баҕар кырдьыкка сытар. Доруобай конкуренция буолуохтаах”.

Петр ПАВЛОВ.

PS: “Уруккунан олорумуохха, уларытыылары киллэриэххэ” суруйууну ааҕа иликтэр, “Дьулурҕан” бу дьыл кулун тутар 28 күнүнээҕи нүөмэрин, эбэтэр dzulurgan.ru сайтка киирэн булан, онно туох туһунан суруллубутун сиһилии ааҕыаххытын, билсиэххитин сөп.

Добавить комментарий

Ваш адрес email не будет опубликован. Обязательные поля помечены *

18 − одиннадцать =