Көбүөргэ ыҥырыллаллар, аҕам саастаахтар!

Муус устар 17-18 күннэригэр В.П. Керемясов аатынан Дьокуускай куорат 3 №-дээх спорка кыһатын тустууга саалатыгар Хотугулуу-Илиҥҥи федеральнай университет профессора, ССРС успуордун маастара, Саха сирин үтүөлээх тириэньэрэ Николай Кириллович Алексеев – Матбор кэриэһигэр аҕам саастаах бөҕөстөргө Саха сирин көҥүл тустууга аһаҕас чөмпүйэнээтэ ыытыллар.

Күрэхтэһии – өрөспүүбүлүкэҕэ көҥүл тустуу сайдыбыта 70 сылыгар ананан тэриллэр. Бу түһүлгэ биһиги бөҕөстөрбүт Арассыыйа уонна аан дойду чөмпүйэнээттэригэр бэлэмнэниилэрин быһыытынан көрүллэр. Манна даҕатан эттэххэ, былырыын Венгрияҕа ыытыллыбыт бэтэрээн-маастардар аан дойдутааҕы чөмпүйэнээттэригэр Алексей Николаев бастаабыта, Андрей Иннокентьев уонна Вадим Данилов үһүс буолбуттара. Оттон Николай Иванов, Платон Саввинов, Иннокентий Данилов — көҥүл тустууга Арассыыйа чөмпүйэнээтигэр бастаабыттара.

Күрэхтэһии Арассыыйа спортивнай тустууга федерациятынан бигэргэммит Тустуу аан дойдутааҕы холбоһугун (UWW) быраабылатынан ыытыллар. Ыйааһыннар – 62, 70, 78, 88, 100, 130 кг, саастарынан бөлөхтөр: А (35-40), В (41-45), С (46-50), Д (51-55), Е (56-60).

Чөмпүйэнээт барыла

Муус устар 17 күнэ, бээтинсэ

10:00-16:30 Кыттааччылары бэлиэтээһин, ыйааһын уонна сэрэбиэй

17:00-17:30 Сүбэ мунньах.

Муус устар 18 күнэ, субуота

10:00-12:00 Бары ыйааһыҥҥа барыллааһын хапсыһыылар

12:00-12:30 Чөмпүйэнээти үөрүүлээх аһыы

12:30-14:00 Тохтобул

14:00-18:00 Чөмпүйэнээт салгыыта. Быһаарыылаах хапсыһыылар. Наҕараадалааһын.

Чөл, чэгиэн-чэбдик олоҕу түстээччилэр, успуорка уһун үйэлэнии үтүө холобурун көрдөрөөччүлэр – эдэрдии эрчимнээх аҕам саастаах бөҕөстөр сытыы хапсыһыыларын көрө кэлэргитигэр ыҥырабыт.

Петр ПАВЛОВ.