Афанасий Илларионовка аналлаах сааскы сүүрүү

Бу аҕыйах хонуктааҕыта Мэҥэ Хаҥалас улууһун Хара нэһилиэгэр Илларионов Афанасий Петрович үөрүүлээх 80 сааһын көрсөр бэлиэ күнүгэр аналлаах иккис сылын ыытыллар 15 км марафон ыытылынна.

Афанасий Петрович бэйэтэ педагогическай үлэ бэтэрээнэ, РФ үөрэҕириитин туйгуна, Учууталлар учууталлара, СР физическэй култуураҕа уонна спорка үтүөлээх үлэһитэ, ХХ үйэ бастыҥ дириэктэрэ, Мэҥэ Хаҥалас улууһун уонна Хара нэһилиэгин Бочуоттаах олохтооҕо, РФ Уопсай үөрэхтээһинин Бочуоттаах үлэһитэ, “За заслуги перед Отечеством II-й степени” мэтээл, уордьан кавалера.

Кини Майаҕа И.Т. Васильев аатынан успуорт Албан аатын түмэлин салайааччыта буолар. 1983 сыллаахха оҕо спортивнай оскуолатын Майаҕа астарбыта. Афанасий Петрович тус бэйэтин көҕүлээһининэн, үүнэр-сайдар ыччаты эт-хаан, өй-санаа өртүнэн уһуйар соруктаах 1994 с. Харатааҕы успуорт лицейын тэрийбитэ. Сүүрүүгэ өрөспүүбүлүкэ 10 төгүллээх чөмпүйүөнэ, рекордсмена, Манчаары оонньууларын 6 төгүллээх призера.

Күрэхтэһии туһунан даҕатан этэр эбит буоллахпына, тэрээһиҥҥэ улуус баһылыгын бастакы солбуйааччы Гаврил Толстяков, Хара нэһилиэгин баһылыга Дария Назарова, физическэй култуура уонна спорт салалтатын салайааччыта Алексей Попов, Хара спортивнай оскуолатын дириэктэрэ Алексей Оконешников кэлэннэр бэйэлэрин эҕэрдэ тылларын анаатылар.

Сүрүн судьуйанан Павел Васильев үлэлээтэ. Марафоҥҥа ол курдук, өрөспүүбүлүкэбит араас муннуктарыттан: Амматтан, Чурапчыттан, Үөһээ Бүлүүттэн, Уус-Алдантан, Өлүөхүмэ улуустарыттан уонна дьоллоох Дьокуускай куораттан сүүрбэ үс киһи кэлэн кыттыыны ыллылар.

Наҕараадалааһын сиэрин-туомун кэмигэр Гаврил Толстяков Афанасий Петрович Илларионовка «Манчаары дойдута – мин дойдум» диэн бэлиэнэн наҕараадалаата. Онтон Ил Түмэн дьокутаата Андрей Михайлович Находкин Ил Түмэн Бочуоттаах грамотатын кыһыл көмүс бэлиэлээх туттарда.

Дьэ, ити курдук 15 км сүүрүүгэ кэрэ аҥаардарга түмүктэри билиһиннэрэбин:

1 миэстэ – Татьяна Артемьева (Дьокуускай)

2 миэстэ – Саргылана Логинова (Өлүөхүмэ)

3 миэстэ – Лия Золотарева (Үөһээ Бүлүү)

Эр дьоҥҥо:

1 миэстэ – Роман Алексеев (Дьокуускай)

2 миэстэ – Мирослав Бурнашев (Уус-Алдан)

3 миэстэ – Айсенбег Черепанов (Амма)

Бу күрэхтэһии кэнниттэн нөҥүө күнүгэр Афанасий Петрович бэйэтэ эмиэ Намҥа тиийэн хайыһарга бастаабыт, Иван Слепцов, Степан Контоев курдук маастардары кыайталаабыт. Онон, Афанасий Петрович эдэр көлүөнэ ыччакка, дьоҥҥо-сэргэҕэ үтүө холобур быһыытынан буолар. Чэгиэн-чэбдик сылдьыҥ, бөҕө туруктаах буолуҥ, чөл олоҕу тутуһуҥ, спордунан, физкультуранан дьарыктаныҥ диэн барыгытын ыҥырабын.

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 3-с куурсун студентката.

Доҕотторо, билэр дьоно түһэрбит хаартыскалара.